800 kilo di pisca den 24 ora di cual 400 kilo tabata djampou
Diadomingo ultimo, bispo di nos dia nacional di himno y bandera, piscadonan di henter Aruba a aglomera pa celebra loke rapidamente ta birando un di e torneonan mas grandi di nos isla. Un cantidad record di 32 boto di tur tamaño y di tur districto, a inscribi diasabra ultimo y sali pisca diadomingo marduga 4’or di marduga y bolbe tera prome cu 4’or di atardi aya na e centro di Spaans Lagoen, na Pos Chikito. Un total di 806.1 Kilogram di pisca a wordo pisa oficialmente durante di e torneo, di cual 399.9 Kilo tabata netamente djampou, e pisca mas codicia pa e comedonan di bon pisca di Aruba.
RECONOCIMENTO NA BALUARTE:
Ya pa 5’or di atardi, e comision organisado y su boluntarionan tabata tin e ganadonan contabilisa y a pasa mando pa Minister di Sector Primario, Sr. Chris Romero y Alex Farro presidente di organisacion pa e parti oficial. Aki duna reconocimento na 3 baluarte di piscamento segun scogi door di piscadonan di e centro. E prome cu a ser yama dilanti tabata Juan Werleman, conocido piscado di Santa Cruz cu tur lama di Aruba a conoce. Siguientemente Sr. Rufo Forencio cu semper ta duna man na e centro y ta bon conoci pa su aporte na piscadonan di e centro. Por ultimo tabata toca honor na Luis Rasmijn, piscado y boluntario fiel di e centro na Pos chikito cu a ricibi su plakaat for di man di Minister encarga cu sector primario Cris Romero y Alex Farro president di e comision organisado.
Ganadonan Mayor Ehemplar:
E ganadonan pa loke ta ehemplar mas grandi, esta e piscanan mas pisa conforme e reglanan di e torneo tabata lo siguiente. Mayor ehemplar Dorado tabata pa e boto Kamel di capitan Dano Carolina cu un ehemplar Dorado cu a pisa 5.4 Kilo. E Brasi di mas grandi a bay pa e boto Tonino di Capitan Leo Briesen cu a pisa 41.4 Kilo. E mayor ehemplar Pisca Cora a bay den man di e boto Cindy Annabel di capitan Nicolas Tromp cu a pisa 4.3 Kilogram. E Picuda cu a resulta e mayor ehemplar tabata pisa 8.9 Kilo di e boto Corka di capitan Roberto Geerman. E boto undaunted di capitan George Hassel a gara e ehemplar Mulato di e torneo cu a pisa nada menos cu 20 Kilogram. Mayor ehemplar Conofes a pisa 9.7 Kilo y a ser gara door di Cindy Annabel di Capitan Nicolas Tromp. E ehemplar mas grandi di Djampou Hala Geel, e pisca mas gusta y gara aya na Spaans Lagoen, a bay pa capitan Chipo Orman di e boto Anmal, cu un Djampou Hala Geel di 7.6 Kilo. E mayor ehemplar Djampou a resulta alabes den e ehemplar mas grandi tambe di henter e torneo, pisando nada menos cu 54.6 kilo di e boto Thalina di Capitan George Werleman. Un tremendo Wasa of Djampou preto (Warsaw grouper) cu a tuma 2 homber pa carga saca for di boto.
Ganadonan overall kilahe:
E ganadonan di e torneo tabata lo siguiente. Na di tres luga pa kilahe overall, esta tur tipo di pisca hunto, a keda e boto Tonino di capitan Leo Briesen cu 90.6 Kilo di pisca. Na di dos luga a keda e boto Corka di capitan Roberto Geerman cu 113.1 Kilo y na prome luga pa kilahe overall a keda e boto Kamel di Dano Carolina como capitan cu a trece tera 117.6 Kilo di pisca.
Ganadonan Rey Di Djampou:
E torneo pa busca e Rey di Djampou ta basa riba ken gara mas Kilo di Djampou. E prome tres puestonan a bay como lo siguiente. Na di tres luga, cu 58.3 Kilo di Djampou gara, e boto Cindy Annabel di capitan Nicolas Tromp. Na di dos luga, cu 58.6 Kilo di djampou pisa, e boto Thalina di capitan George Werleman. E rey di djampou pa 2019 a bay pa e conocido Dechi Bislip capitan di e boto Elizee cu a pisca nada menos cu 79 Kilo di Djampou pa asina bay cu e corona. Dechi ta conoci caba pa bay cu e corona y segun el a splica cu ya ta su di 3 of ta 4 biaha cu e ta bay cu e titulo, y di e forma ey ta retando di awor caba tur piscado pa prepara pa kita e titulo di dje otro aña. Pabien na e rey di djampou 2019 Dechi Bislip.
Exitoso y bon ambiente:
E torneo a bay den bon ambiente y sin eventualidad. Na tera tabata tin tent cu cuminda y bar bon surti cu musica crioyo un ambiente dushi di piscado. Hopi publico a pasa disfruta di e evento y tambe probecha pa cumpra pisca fresco cu piscadonan tabata ofrece riba e dia aki. Comision organisado ta yama danki na Fundacion Centro di Pesca Hadicurari, Santa Rosa y un lista largo di sponsor cu contribui den varios forma pa haci e evento aki uno exitoso un biaha mas. Un danki y felicitacion ta bay na tur e participantenan como tambe tur boluntario cu a traha pa realisa e evento y haci esaki bira exitoso un biaha mas. Danki.