Aruba Volleyball Association hunto cu IBiSA y Studiantenan di Universidad di Aruba a organisa durante e weekend cu a pasa weganan di beach volleyball na Eagle Beach tanto pa e Scolnan Secundario y e Atletanan di Beach Semi-Pro.
E Torneo Escolar entre a Scolnan Secundario a finalisa den 1 dia unda den Damas e Team di Filomena College (4/4) a bira e Scol Ganado y den Cabayeros e Team di Augustinus College (4/4) a bira Campeon ganando for di Filomena College cu e score di 2-0 (21-13 y 21-17) pa asina bira Sub-Campeon di Torneo Escolar.
Den e Grupo di Semi-Pro, e Campeonato a wordo hunga segun e sistema “round robin” entre e 6 Teamnan di Cabayeros y 4 Teamnan di Damas. E Competencia tabata bon entre e Atletanan semi-pro apesar cu e solo tabata hopi fuerte y e santo blanco bastante cayente.
E wega final di Damas a bay entre e Teamnan “Pure Energy” cu e Atletanan Shaira Mackay y Kayla Arends y e Team “Minosa” cu e Atletanan Nagwa Lopez y Claricel Wolff. Team Campeon y invicto a bira e Atletanan Kayla Arends y Shaira Mackay mientras cu Claricel Wolff y Nagwa Lopez a keda na di 2° luga.
Den e categoria di Cabayeros semi-pro e weganan final a bay entre e Cabayeronan di Spartans Elmerlindo Robles de Medina y Dwayne Angela y nan contricantenan di Orange Team Fransua Angela y Luis van der Linden. Ambos Team a bataya pero na final e Team di Spartans Elmerlindo y Dwayne a triunfa cu e score di 2-0 (21-18 y 21-16) pa bira Campeon invicto di e Campeonato Nacional di Beach Volleyball.
E Campeonato a clausura cu entrega di e Copa y Medayanan na e respectivo ganadonan pa e Studiantenan di Universidad di Aruba, Nicolette Habibe y Mileidy Gonzalez, den presencia di Presidente di Aruba Volleyball Association Sra. Filomena Daniel – Curiel.
Aruba Volleyball Association, IBiSA y e Studiantenan di Universidad di Aruba ta gradici tur instancia, comercio y Atletanan cu a apoya e Evento di BeachVolleyball aki cu nan contribucion, participacion, e dushi ambiente y pa e bon weganan di beach volleyball cu a haci e evento un exito.