For di diabierna 16 di maart lo inicia cu e tradicional torneo di ahedrez Copa Himno y Bandera edicion 2018 mientras tres dia despues esta dialuna dia 19 di maart esaki lo termina cu e entrega di e premionan. Despues di un exitoso torneo di Copa Betico, awo a toca turno na e federacion di Ahedrez pa organisa un otro grandioso torneo enconexion cu e celebracion di nos Dia Nacional Himno y Bandera. Mester bisa cu e torneo lo wordo hunga den 3 diferente categoria esta Open, U-18 y U12.
E categoria di U-12 lo ser hunga riba dialuna mientras e categorianan di Open y U18 lo wordo hunga e dianan 16, 17 y 18 di maart. Lo tin trofeo y medaya pa tur esnan cu triunfa den e Copa Himno y Bandera. Tur wega lo tuma luga na e cas di ahedrez esta e clubhuis na Nieuwstraat 11, Oranjestad. E torneo aki ta cay bou di torneo nacional cual ta conta pa rating y tambe pa puntonan di FAA.
Stichting Sportsubsidie Aruba ta subsidia e competencia di ahedrez celebrando nos Dia Nacional Himno y Bandera 18 di maart.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.