Despues di un exitoso torneo di Copa Betico, awo a toca turno na e federacion di Ahedrez pa organisa un otro grandioso torneo en conexion cu e celebracion di nos Dia Nacional Himno y Bandera. For di diabierna 17 di maart lo inicia cu e tradicional torneo mientras tres dia despues esta diadomingo dia 19 di maart esaki lo termina cu e entrega di e premionan. E torneo aki ta cay bou di torneo nacional cual ta conta pa rating y tambe pa puntonan di FAA.
Mester bisa cu e torneo lo wordo hunga den 3 diferente categoria esta Open, U-18 y U12. E categoria di U-12 lo ser hunga riba diasabra dia 18 di Maart y e torneo lo consisti di 7 buelta. E prome buelta lo inicia pa 9.30 di mainta y e ultimo buelta lo ser hunga pa di merdia. Despues lo entrega e premionan na e demas ganadonan. E categorianan Open y U-18 lo ser hunga riba diabierna 17, diasabra 18 y diadomingo 19 di Maart y lo hunga un total di 5 buelta. Lo bay tin un ceremonia di apertura diabierna 7.45 di anochi mientras lo hunga e prome buelta 8or pa 11.30 di anochi. Diasabra e lo ta atardi 3 or pa 6or y 7or pa 10.30 di anochi. Diadomingo dia 19 di Maart lo hunga di 10or pa 1.30 di merdia y 2or pa5.30di atardi. Entregamento di premio lo ta banda di 6or di atardi. Tur wega lo tuma luga na e cas di ahedrez esta e clubhuis na Nieuwstraat 11, Oranjestad. Nos atletanan di ahedrez ta prestando riba un nivel haltisimo. Nos hungadonan local a sa na briya den e torneo internacional den nos region y tambe ta participa na e campeonato mundial di ahedrez.
Un danki sigur na Lotto, e Loteria di Aruba pa medio di Comision di Subsidio cu a subsidia e torneo di ahedrez Copa Himno y Bandera 2017.
Cumprando weganan di Lotto, e Loteria di Aruba manera Catochi, Big 4, Zodiac, Wega di Number Korsou, Lotto di Dia, Lotto 5, Mini Mega, Mega Plus y weganan di Raspa bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.