Sindicato TOPA, presidi pa Rene Bernabela, den un conferencia di prensa a anuncia e decision tuma pa nan afilia na un organisacion internacional. Nan tabata den compania di Ronald Ignacio, representante di PSI Region Caribe.
Awe mainta tambe e sindicato tabatin un presentacion pa su delegadonan cu a haya tur informacion necesario di e organisacion cu Ignacio ta representa y kico ta bentahanan di ta un miembro di PSI Caribe.
Sindicato TOPA tabata miembro caba di PSI pero di region Andina (specialmente pa paisnan Latino). Pero mirando e diferencianan den cultura, lenguahe y informacionnan necesario, a dicidi di afilia na PSI Super Region Caribe, unda cu tin mas similaridad.
Asina por ehempel, miembro y shopstewardnan di TOPA por participa den workshop y conferencianan organisa pa PCI Caribe.
Ignacio di su banda a splica kico tabata su rol den e Congreso Extraordinario di TOPA den Compleho Deportivo Harry Bareño na Piedra Plat. El a conta kico el a haci den pasado y plannan pa futuro. Antes mayoria sindicato tabata afilia na CLAT.
Trahadonan mundialmente ta enfrente mesun tipo di retonan, pa cual sindicalismo a yega na e conclusion cu mester tin organisacion internacional unda un ta yuda otro. PSI tin e organisacion dividi den subregion y esun di e area aki ta di Caribe y ta enfoca gran parti di Caribe. Mientras cu esun Andino tabata concentra hopi riba problemanan na Latino America.
Segun Ignacio, e realidad di Caribe ta diferente di esun di e paisnan grandi di continente Americano. E paisnan aki ta hopi grandi y nan problemanan tambe, pa cual no tin asina atencion pa e islanan chikito. Esaki ta contrario na e division di Caribe cu ta concentra hopi riba islanan y economianan chikito. Esaki ta e motibo cu a scoge pa afilia na e division di Caribe.