Miembronan di e ekipo di experto riba tereno di awa y energia di TNO Caribbean a bishita un finca special na Cuba. E finca aki a keda estableci como un demostracion. Y e meta di e bishita tabata pa duna un presentacion di un plan con pa implementa energia sostenibel pa irigacion y refrigeracion desaroya pa TNO Caribbean. E bishita a sosode a base di un invitacion di Gobierno Cubano y den colaboracion cu e organisacion Hulandes pa desaroyo, HIVOS. E plan cu a keda presenta na Cuba na october, tabata resultado di un bishita cu TNO Caribbean a haci caba algun luna prome, riba invitacion di Gobierno Cubano.
E motibo di e peticion pa TNO Caribbean duna un conseho na Cuba ta danki na su reputacion riba tereno di “Smart Sustainable Island Solutions,” esta Solucionnan sostenibel inteligente pa islanan cu ta enfoca riba e region Caribense. Ta trata aki e desaroyo di conceptonan pa produccion sostenibel di coriente y awa potabel, pero tambe procesamento di desperdicio y e uzo optimal di fuentenan local y recursonan natural cu por yuda. Electricidad y awa ta esencial pa isla y regionnan aleha. Ainda ta haci hopi uzo di combustibelnan fosil pa produccion di awa y coriente den e region Caribense. Esaki, mientras cu e islanan mes tin un sin fin di fuentenan energetico duradero den forma di biento, solo y masabiologico. Sinembargo, pa implementa e fuentenan natural local, pa asina e distribucion di coriente por bira confiabel y pagabel ta exigi experticio tecnico nobo.
E proposicionnan pa solucion cu TNO Caribbean a bin cun’e ta trata di un combinacion di panelnan solar pa e refrigeracion di juicenan di fruta y e conversion di resto di mata na gas biologico. E combinacion aki lo mester conduci na un uzo mas abao di coriente, un produccion di coriente mas confiabel y consecuentemente un cuenta di coriente mas abao. Si e experimento aki resulta exitoso na e finca special aki, lo por amplia e concepto pa otro produccionnan.
Tabata na October cu TNO Caribbean a presenta su plan durante un tayer pa e Ministerio di Agricultura y Universidad di Agricultura di Cuba, den presencia di representantenan di diferente finca. Banda di esey a papia tambe, con Cuba por haic un transicion completo for di combustibel fosil pa mas implementacion di energia duradero local.