TNO Caribbean, un partner di e Centro di Excelencia pa Estadonan di Isla Chikito (SIDS) den Desaroyo, COE, na Aruba, ta ehecutando siete mision di Asistencia Tecnico na SIDS pa nan desaroyo di sostenibilidad di isla. E misionnan ta enfoca riba e area di energia, maneho di desperdicio y turismo sostenibel. E Asistencia Tecniconan aki ta un continuacion di e training ‘Trahando Plan Sostenibel pa Futuro pa SIDS’ cu COE a organiza na 2016. E training tabata facilita pa TNO Caribbean. Mas di 25 representante di SIDS rond mundo a participa na e curso na Aruba y a siña di e miho practicanan di nos isla y a comparti conocemento di nan propio experiencianan.
E obhetivo di COE ta pa promove comparti conocemento entre SIDS y e Cooperacion Sur Sur, den logra e asina yama United Nation’s Sustainable Development Goals (SDG’s). E obhetivonan di desaroyo sostenibel aki a keda adopta pa e 194 paisnan cu ta forma parti di e Asamblea di Nacionnan Uni y tin como meta pa caba cu pobresa, proteha planeta y sigura prosperidad pa tur, como aspecto di un agenda di desaroyo sostenibel. Cada SDG, of obhetivo, tin enfoke specifico cu mester logra denter di 15 aña. “Nos a scoge TNO Caribbean, pa motibo di su experiencia cu solucionnan sostenibel den contexto di isla, como tambe nan combinacion unico di investigacion y implementacion di proyecto,” St. Arno Boersma, gerente di COE a splica.
E prome mission tabata na Antigua y Barbuda, mesora despues di Horcan Irma. E topico tabata e desaroyo di un plan di futuro pa maneho di desperdicio. Manera mayoria isla, Antigua y Barbuda tin reto cu maneho di sushi. Nan landfill, nan dump, a surpasa su capacidad y mester di un solucion sostenibel a termino largo. Un team di expertonan di TNO a traha cu partnernan local pa identifica solucionnan y desaroya plannan pa futuro pa asina atende cu e problema. E participantenan tabata contento di por a haya inspiracion di proyectonan tumando luga riba e islanan ABC y ta buscando posibilidad pa colabora cu islanan den region. E di dos mision tabata na Jamaica, unda a dirigi esfuerso pa asisti e team di e pais encarga cu implementacion di SDG pa compronde miho e sistemanan energetico di isla y desaroya tambe un strategia pa monitor e indicadonan di e SDG pa energia. Un conclusion importante ta e importancia pa haya un bista profundo den e diferente accionnan relaciona cu energia pa asina miho observa progreso y tuma accionnan dirigi.
E team di TNO cu ta brinda e training di asistencia tecnico ta basa su mes riba su experiencia na Aruba y su trabou den e area mas grandi di Caribe. Experto Medio Ambiental y di Maneho di Desperdicio di TNO, Sr. Kris Kats, a bisa cu “TNO Caribbean tin algun aña caba trahando cu islanan ABC pa studia solucionnan pa maneho di sushi, estudionan comercial pa re-uzo y posibel colaboracion regional. E lesnan cu a sali di e esfuersonan aki ta posiciona nos bon pa desaroya strategianan cu ta tene cuenta cu e sensibilidad di e escala di isla y contexto cultural.”
Consehero Strategico pa Energia y Desaroyo di Isla Chikito di TNO, Sr. Ruurd Schoolderman a comenta cu “sistemanan di energia di isla tin un karakteristica unico pa motibo di nan escala chikito y e hecho cu nan no por depende riba un sistema mas grandi, na momento cu e sistema primario cay afo. Esaki ta haci cu integracion di energia duradero y costo pagabel ta un reto. Nos ta basa nos mes riba e lesnan cu a y ta siña na Aruba y ta comparti nos experiencia como parti di e bishitanan di asistencia tecnico.”
TNO Caribbean lo bishita cinco estado di isla den e proximo lunanan, manera Vanuatu, Seychelles y Republica Dominicana, ademas di Belize. E bishitanan aki lo nifica cu ta hiba sosten tecnico, ta promove compartimento di conocemento y ta amplia e red di Aruba y SIDS como parti di e esfuersonan di COE.