Recientemente TNO Caribbean a organisa un programa educativo riba energia solar pa Colegio EPI (Educacion Profesional Intermedio) in Aruba. Esaki tabata un programa educativo specialisa riba tecnologia Photo-Voltaico (PV) designa door di TNO Caribbean den cooperacion cu Sr. Carlos Martinus, Dean Of Academic Affairs di e Unidad Ciencia & Tecnologia di Colegio EPI. E proyecto aki ta parti di TNO su compromiso pa transferencia di conocemento y creamento di capacidad den energía renobabel na Aruba y den region.
Un total di 63 studiante local di EPI di electrical, mechanical y civil a paricipa den un programa cu tabata inclui un resumen di tecnologia Photo-Voltaico duna door di expertonan di TNO Caribbean. Esaki a wordo sigui pa un tour door di e TNO Solar Test Site na Colegio EPI pa asina siña over e aspectonan practico di energia solar. E studiantenan tambe a ricibi oportunidad pa haya experiencia cu ehercisionan practico unda e studiantenan mester a haci nan mesun tests cu mobile solar training kits (MTT). E ekiponan aki a keda adkiri door di TNO Caribbean for di Arizona State University y fia na Colegio EPI pa e meta aki.
Un di dos focus tabata e entrenamento di un total di 12 maestro di EPI. E maestronan aki a atende un ‘Train the Trainers course’ di dos dia riba tecnologia Photo-Voltaico coordina door di TNO Caribbean y duna door di un instructor di Arizona State University (ASU) for di Merca. E meta di e curso aki tabata pa haci e staf di maestro di Colegio EPI Unidad Ciencia & Tecnologia suficiente capas pa despues nan mes por duna e educacion specialisa aki.
E motibo pa organisa e actividadnan aki ta pa crea interes bao di studiantenan pa un carera den energia renobabel y pa yuda engrandece capacidad den un populacion local di profesionalnan Arubano specialisa cu por drenta e industria solar na Aruba y despues tambe e region Caribense.
For di e un perspectiva di transferencia di tecnologia, e training aki tambe ta enfatisa algun aspectonan unico cum mester tuma den consideracion den region Caribense. Ehempelnan di esaki ta e solo fuerte, sistema di islanan y con pa trata cu condicionan climatologico duro (salo, stof, temperatura, biento).
Un encuesta conduci na final di e curso a indica cu por lo menos 64% di e studiantenan lo ta interesa pa haya un certificacion profesional den tecnologia Photo-Voltaico. Esaki ta bon noticia pa e sector aki cu ta creciendo y cu ta crea oportunidad un forsa laboral local. TNO Caribbean lo continua di ta un partner local pa yuda crea capacidad local y haci investigacion riba solucionan local pa energia renobabel.