Durante e encuentro cu Minister President Mike Eman a sostene cu directiva di TNO Energia na Hulanda e siman aki, a sinta cu e director entrante di TNO su oficina na Aruba. Ta trata di Eric Veldkamp, kende te awo tabata e Director di Investigacion, Mobilidad Urbano y Medio Ambiente na TNO Energie y lo reemplasa Jan Ebbing, kende durante ultimo cinco aña tabata na cabes di TNO Caribbean Branch.
Veldkamp a bishita nos isla caba den dos oportunidad durante ultimo paar di luna pa asina cera conoce cu e ekipo di trabou na Aruba y nos pais riba su mes. E ta bay asumi su posicion nobo aki dos luna. “Un isla super bunita cu oportunidadnan increibel pa test innovacion, tecnica y metodonan nobo. Mi ta wak hopi oportunidad, fuera di loke e oficina TNO Caribbean na e momentonan aki ya ta haciendo. Pesey mi ta wak hopi na e islanan y e retonan cu hunto nos por duna forma,” e director nobo a comenta.
E puntonan principal riba mesa aworaki pa TNO ta e proyectonan di Smart Community y di Alga. Aspectonan cu agencia mester bay tene cuenta cu ne awo ta, por ehempel, percura pa tin suficiente experto na Aruba, con ta bay atende cu e mercadeo di e proyecto y tambe kico ta bin despues pa loke ta trata innovacion riba nos isla.
Director di TNO Energie, Dr. Mart van Bracht a duna di conoce cu, adicional na e cambio di liderazgo na TNO Caribbean Branch, tambe ta busca pa expande e personal. Actualmente e operacionnan ta wordo carga dor di un ekipo di 20 persona, pero ya caba ta wak cu den 2017 esaki lo crece te na 30. Como tal, TNO ta bay busca tambe un Director Commercial pa asisti e gerencia. TNO Caribbean Branch ta trahando riba tur otro isla di Reino Hulandes, pero tambe na Colombia, Republica Dominicano, Trinidad & Tobago y siman pasa, director Ebbing tabata na Cuba; tur esaki for di nan oficina sede na Aruba.