Tisa LaSorte, como representante di Sociaal Economische Raad, tabata cerca Gobernador Alfonso Boekhoudt awe den e ronda di consulta di e proceso pa formacion di un Gobierno nobo.
SER ta un organisacion consistiendo di representante di gobierno, sector priva y sindicato, cu ta brinda conseho na Gobierno riba temanan di interes nacional y pa maneho.
SER, el a splica, a traha un lista di loke ta nan preocupacionnan y kico ta kere mester ta prioridadnan di e gobierno nobo, y a entrega esaki na Gobernador. “Eleccion a pasa y awor ta importante pa tin un bon proceso di formacion pa yega na un gobierno pa tuma e responsabilidad serio y atende cu e asuntonan serio cu tin den e landspakket. Nos tin un lista di reforma cu nos ta spera e Gobierno nobo bay atende cu nan,” LaSorte a bisa.
Mayoria di e reformanan cu nan ta papia di dje, ta poni caba den e Landspakket. E ta kere cu mester traha cu Hulanda pa haya un bon reforma riba tur tereno. Ta hopi trabou tin pa haci pa loke ta reforma. Si tin un gobierno responsabel, cu ta serio, cu ta compronde cu e reformanan aki mester atende cu nan y ehecuta nan na e debido tempo, no mester tin preocupacion. E reformanan aki ta pa bienestar y futuro di Aruba, aunke cu nan ta dificil.
SER t’ey pa tur gobierno, LaSorte a bisa. Sea pa duna conseho pidi of no pidi.