LOS ANGELES, California – Un muhe a wordo deteni y polis di Los Angeles (LAPD) tabata busca un homber en conexion cu un tiroteo cu a sosode zuid di Los Angeles cu a causa tres morto y por lo menos un dozijn di herido pasa di mey anochi di diasabra.
E hecho a sosode rond di 12’or y mey den un cas cu tabata funciona como restaurant, estilo Jamaiquino, segun bisiñanan di e cuadra 2800 Rimpau boulevard di e zona di West Adams, unda cu parce tabata tin un fiesta.
Segun LAPD, tabata tin un discusion entre algun invitado. Tras algun momento di tension, varios sospechoso a bandona e luga. Ora cu nan a bin bek, nan tabata arma y a cuminsa tira riba personanan reuni na e luga.
Polis a reporta cu cerca di 50 persona a sali coriendo for di e luga, cu a converti den un caos completo.
“Tres persona a muri na e luga y 12 a wordo hiba hospital cu lesionnan di diverso consideracion,” e agente Mike Lopez a bisa, kende a reporta cu varios di e heridonan tabata grave.
E tres fayecidonan tabata homber. E genero y edad di e heridonan no ta conoci.
“Nos no por tolera cu e tragedianan aki multiplica den comuniddanan atrabes di Merca,” e alcalde Eric Garcetti a bisa den un comunicado parti mainta.
Di su banda, e procurador di Los Angeles, Mike Feuer, a bisa den un comunicado cu “Los Angeles ta yora pa e perdida di bida sin sentido den un di nos barionan mas keri. Mi plegarianan ta bay na e victimanan y nan famia.”
“Mi ta pidi na cualkier persona cu tin informacion pa yuda nos polisnan pa e responsabelnan wordo hiba dilanti husticia y nos cayanan ta mas sigur,” Feuer a expresa.
Fuente: La Opinion