MICHIGAN, Merca- E universidad a notifica cu dos persona a fayece den e cambernan di e institucion pero cu nan no tabata studiante y tampoco a ofrece mas detaye riba nan identidad.
Dos persona a muri diabierna door di tiroteo riba e campus di e universidad Central Michigan, den e parti noord di Merca. Autoridadnan ta en busca di e atacante.
“Dos persona a ricibi tironan cu a causa nan morto den e Campbell Hall, den e campus diabierna mainta. E fayecidonan no ta studiante y polis ta sospecha cu e caso tin di haber cu un asunto domestico”, e universidad a bisa den un comunicado. Un agente policial di e universidad a identifica e presunto autor di e tironan como James Eric Davis, di 19 aña di edad y studiante universitario.
Davis tabata conoci pa su problemanan cu ley. Polis a hib’e un hospital e anochi prome cu e tiroteo “pa un incidente relaciona cu droga: un overdosis of mal reaccion ariba droga”, según e vocero di e polis di Campus, Larry Klaus, den un conferencia di prensa.
E campus a keda cera, horanan despues di e sucedido, pues e sospechoso ainda no a wordo localisa pa autoridadnan.
E echonan aki ta bin mei mei di un debate na Merca over di violencia cu armanan di candela y e papel cu forsanan di siguridad mester hunga ora di detene un posibel atacante. E debate a inicia despues di cu 17 persona a muri door di un tiroteo den e scol secundario Marjory Stoneman Douglas, na Florida.
Ainda no ta cla ki tipo di arma a wordo uza den e crimen di Michigan of con el a hay’e. E normanan estatal ta permiti pa tin arma cu permiso, mientras cu e Universidad Central di Michigan ta prohibi esaki ariba full e campus.
E ultimo hecho aki ta suma su mes na e lista largo di tiroteonan cu a wordo produci den establecimentonan educativo na Merca, manera Newtown, unda cu 26 persona a muri den un scol primario na 2012, of di Virginia Tech, den e campus di un universidad di oost di e pais cu a provoca 32 morto na 2007.