MOSCU, Rusia- Tres miembro di e banda criminal conoci como ‘GTA’ a wordo asesina den e Tribunal Regional di Moscu, segun e vocero di e polis regional, Tatiana Petrova.
E organisacion tabata dedica na mata chauffeurnan den e area di Moscu y a haya su nomber debi na nan ‘modus operandi’ cu tabata similar na e wega ‘Grand Theft Auto’, of ‘GTA’. personana den e edificio mester a wordo evacua.
Petrova a detaya cu miembronan di e banda a ataca e guardianan y a purba na kita e arma reglamentario for di nan, mientras nan tabata wordo escola pa un lift di e edificio.
Segun e vocero, tres miembro di e banda ‘GTA’ a wordo mata ora cu nan tabata purban scapa y dos mas a wordo herida.
“Un miembro di e Guardia Nacional Ruso a wordo herida y mester a wordo interna, mientras dos polis a wordo herida”, segun Petrova.
Un testigo, e abogado Sofía Rubasskaya, a relata cu a skucha por lo menos 20 tiro.
Debi na su modus operandi, miembroann di e banda tabata conoci como ‘GTA’. E criminalnan tabata para e autonan y tabata tira e chauffeur y pasaheronan mata sin piedad. E tabata un organismo hopi bon coordina, encabesa pa varios lider y cu semper tabata sigui e mesun metodonan ora di comete e crimen. Tabata tin un planificacion hopi cuidadoso di cada crimen, un division di e rolnan hopi cla entre e miembronan y un sistema sofistica di conspiracion, segun investigadonan, kenden a bisa cu e unico motibo di e asesinatonan tabata placa: nan tabata horta nan victimanan.
Fuente: https://actualidad.rt.com