THOUSAND OAKS (CA), Merca- Al menos 13 persona, entre nan un polis, a perde nan vida, mientras cu 10 otro a resulta herida diaranson anochi durante un tiroteo registra den e Borderline Bar & Grill di e ciudad di Thousand Oaks, California, segun e comisario di polis. Geoff Dean, cita pa AP a informa. E autor di e atake tambe ta entre esunnan cu a muri.
E vocero di polis local, capitan Garo Kuredjian, a precisa cu e cantidad di victima por aumenta, ya cu mas di shen persona tabata den e local na momento di e atake.
Segun testigonan, e autor di e tiroteo tabata un homber halto, bisti na preto cu’n capuchon cu tabata tapa su cabes y su cara parcialmente, segun e relato cu testigonan di e suceso a haci na canalnan di television local na e luga di sucedido. E atacante a tira prome ariba un persona cu tabata traha na e entrada di e local, tirando ariba e multitud den un forma cu tabata parce ‘a lo loco’.
Varios persona a sufri heridanan menor, incluyendo algun causa den nan desesperacion pa huy, Dean a bsia.
E sargento Ron Helus y un polis di trafico cu tabata cerca di e luga tabata e promenan pa responde na e yamada di e servicio di emergencia.
Helus a wordo tira mata casi mesora cu el a yega, cu varios disparo, Dean a bisa. E otro polis a haci e perimetro limpi, a logra saca Helus for di e local y a spera ariba e yegada di un ekipo di SWAT y otro agentenan.
Pero pa ora esakinan a drenta e bar, e tironan ya caba a stop. Nan a haya e curpanan sin bida di e 13 personanan, incluyendo e autor. Motibonan di e atake no ta conoci.
Segun e victimanan, e atacante a mata un security na momento cu el a drenta den e restaurant. Despues el a tira yen di smoke bomb y sigui tira ariba esunnan den e local.
Autoridadnan no ta descarta cu por trata di un atake terorista.