Tira zeta den Bubali plas ta haci daño substancial na sistema ecologico, pero tambe ta ilegal

E pueblo mester wordo conscientisa cu e importancia di Bubali plas ta grandi, segun Norman Kuiperi, director interino di Fundacion Parke Nacional Aruba. E ta grandi pa no solamente bestianan, pero mas y mas nos turismo tambe ta bay den direccion cu nan kier yega wak bunita plas cu yen diferente parha y bestia den dje. Pa loke ta trata e leynan di proteccion, tin un plan pa bay wak con pa preveni – cu sancionnan – ora hende basha awa di pos den lugarnan manera Bubali plas of tira zeta. Hende mester ta consciente cu net na otro banda tin lugar pa hiba bo awa sushi na RWZI.

Hende mester realisa cu esakinan no ta lugarnan pa tira azeta pasobra bo ta mata parha, pisca y si mas hende cuminsa realisa e balor di e area aki, nan ta bin aprecia e bunitesa di dje segun sr. Kuiperi.

Sinembargo, e problema ta tambe cu den pasado yen restaurant den e region tabata tira azeta den e sistema di riool, unda cu tabata tin e sistema bieuw prome. Logicamente nan no kier gasta placa pa hiba e zeta aki pa un compania y ta mas facil pa tira esaki den mondi etc. Ora cu den pasado a bin topa na varios ocasion cu tabata tin zeta den e awa sea di cushina of auto, e ta haci daño substancial na henter sistema ecologico di bubali plas. Un sistema di tanki a wordo traha caminda e awa sushi cu e zeta ta drenta un tanki prome, pasa pa e otro, lagando e zeta den e prome tanki manera un tipo di filter.

Precausionnan necesarionan a wordo tuma por medio di tur instancianan concerno, y awor e unico manera pa zeta drenta aworaki den e area di Bubali plas ta si un hende para eynan y basha esaki deliberadamente. “Nos ta pidi pueblo pa ta consciente di dje, si mira cosnan asina ki, por fabor yama polis raporta esaki pasobra e cos aki ta ilegal”, segun sr. Kuiperi.

Comments

comments