Como preparacion pa e temporada di vakantie grandi, cu ta den porta, Departamento di Aduana ta duna e biahero local algun tips pa tene cuenta cune:
Formulier Tijdelijke Uitvoer
Departamento di Aduana ta recomenda biaheronan pa registra articulonan manera laptop of tablet na oficina di Aduana na Aerocargo of na Aeropuerto. Esaki ta conta solamente pa articulonan di balor cu ta practicamente nobo y cu e biahero no tin un comprobante cu a cumpra e producto aki na Aruba of cu a yega di cumpre den exterior y cu e derecho di importacion ya ta paga. E formulario ta un comprobante cu e persona a sali cu e articulonan for di Aruba y e ta pa evita cu mester paga impuesto ariba e articulo aki na momento cu e drenta bek. Tur biahero por download e formulario di Tijdelijke Uitvoer for di riba e website www.douane.aw . Yena e formulario delanta y promer cu biaha pasa na oficina di Aduana na aeropuerto, of na e seccion di Aerocargo pa registra e formulario. Asina e formulario ta valido ora di bin bek di bo dushi vakantie.
Exoneracion di impuesto riba ekipahe di biahero:
1. Nos ta conseha tur persona cu biaha pa exterior y cu a cumpra articulonan den exterior pa warda tur comprobante di pago.
2. Haci un calculacion di e balornan di e productonan.
3. Si e balor di productonan surpasa 400 florin, pasa directamente na balie di Aduana na aeropuerto pa paga e impuesto di importacion y of accijns.
4. No warda riba e control di Aduana riba ekipahe pa declara productonan cumpra.
5. Pasahero por trece un cantidad limita di productonan manera alcohol y tabaco cu exoneracion di impuesto.
Ta prohibi pa importa carni of productonan di carni
Departamento di Aduana ta informa tur persona cu ta biahando pa exterior of cu ta preparando pa ricibi personanan for di exterior cu ta prohibi pa importa carni of preparacionnan traha di carni manera cu ta bini for di Sur America y Centro America. Departamento di Aduana lo kita e mercancia y despues entrega esaki na Vetenaire Dienst cu lo destrui e mercancia menciona. Mas informacion over di e ley yama: “Slacht en Keuringsverordening” por lesa riba nos website www.douane.aw.
Mercancianan prohibi of cu mester di permiso
Biaheronan y importadornan (di carga) mester ta conciente di e reglanan prescribi den diferente ley encuanto importacion of exportacion di mercancia of transportacion di mercancia cu ta rekeri un permiso y/of cu ta prohibi. Ehempel di mercancianan prohibi ta productonan manera droga, remedi, mata, bestia y armanan (di candela).
Pa mas informacion encuanto preparacion pa biahero por bishita nos website www.douane.aw.
