Segun Parlamentario Jennifer Arends-Reyes, e mocion entrega pa su persona durante tratamento di presupuesto 2015 pa logra habri un opcion pa graduadonan di medicina den region a cuminsa cosecha exito. Den e mocion presenta a pidi gobierno pa explora e opcion pa extende of brinda fiansa di estudio na esnan cu a caba nan estudio di medicina den region pero cu lo desea di sigui nan estudio por ehempel na Spaña pa haya e registracion di ‘MIR’, cu ta ekivalente na e ‘BIG’ registratie di Hulanda. Pa basta aña e graduadonan aki no tabata tin un contesta concreto di kico lo por brinda nan exactamente. Diferente graduado di medicina den region a trece dilanti cu nan lo no tin obhecion pa sigui estudio na Spaña pero e costonan ta keda halto pa nan por cubri esaki riba gasto propio. Durante tratamento di presupuesto 2017 Minister encarga cu Enseñansa a indica cu na e momentonan aki tin 7 graduado di medicina den region a aplica y haya fiansa pa estudio pa asina logra nan meta. E escogencia pa studia medicina den region ta un escogencia cu studiantenan mester ta hopi conciente di scoge un trayectoria mas largo cu a premira y cu na final tin un costo halto cune. E situacion ideal lo ta si na Aruba mes lo por bin cu un trayecto pa asina yega na e registracion di BIG pero e no ta asina facil mirando cu tin e discusion di entre otro di kico ta considera ‘bekwaam’ y ‘bevoegd’. Spaña ta custumbra di tin suficiente luga, guia y sistema di programa pa yega na e acreditacion desea. Tanten cu Aruba no bin cu un trayecto pa yega na e registracion cu e cooperacion di un Universidad di Hulanda awe tin sikiera un opcion pa nos yiunan di tera cu a caba nan estudio di medicina den region. Pais Aruba ta brinda e opcion pa nos graduadonan di medicina aplica pa un fiansa di estudio pa nan por haya nan registracion y lo por bin bek traha na Aruba pa sigui contribui na e mehoracion di Salubridad pa nos pueblo. Sperando cu den futuro lo tin mas opcion pa nos graduadonan pero contento di por a contribui y yuda pensa na un opcion na beneficio di nos hobennan profesional sra Arends-Reyes ta termina bisando.