Riba noticianan internacional a bin haya sa di un droga nobo, cu ta mustra mescos cu un mangel, gummy bear etc. Sra. Rulienne Arends di Fundacion Anti Droga Aruba ta amplia.
E droga aki ta den mesun forma, e ta parecido na un mangel tambe. Ora bo wak’e bo ta kere cu e ta un mangel. Personal di FADA mes a wak e video di e noticia. E ta un droga sintentico, mescos cu exctasy. E ta un droga cu ta pone hende halunica y e hende ta bira paranoid door di esaki. E droga aki no tin un nomber specifico p’e ainda. Pero si e ta un droga cu ta circulando caba na Miami.
Tin mas rednan internacional cu a cuminsa pone atencion ariba e droga aki. Na New York nan a detene un paar di hende cu tabata tin “molly”, exctasy, y tambe nan a haya un tipo di droga ariba nan. Na New York nan a haya un cas cu tin e ingredientenan pa traha e tipo di droga aki. Na Miami nan a detene un Baron di Droga y a aresta un paar di hende cu tabata tin e productonan pa traha e droga aki.
FADA kier a pidi mayornan, esunnan cu tin muchanan rond di nan, docentenan na scol, tur hende cu tin mucha, cu ta biba cu nan of ta traha cu mucha, pa ta hopi consciente awendia over di droga. E personana cu ta haciendo esaki, ta haci’e den tur forma posibel. Nan ta spera cu e droga aki no yega Aruba, pasobra e ta un peliger hopi grandi pa nos muchanan. Mayornan sea cauteloso, splica bo yiunnan, pa no tuma mangel for di ken cu ta y si bo yiu bin cu mangel cas, revisa esaki. Wak kico e ta.
E mangel aki en berdad ta parce un gummy bear of e mangel cu tin sucu den dje, pero ora bo mishi cun’e e ta sinti full diferente. Pero e droga ta den dje, e ta bin den forma di un cristal pero nan ta purba cubri e droga aki cu un laag di mangel. Esey ta loke mayornan mester haci, conoce e droganan un tiki mas.
Si mayornan tin pregunta of inkietud, nan por contact FADA libremente y nan lo splica e mayornan mas ampliamente over di e droga aki.
Sra. Rulienne Arends tambe ta haci apelacion pa ta mas cauteloso vooral cu muchanan. Pero esaki ta conta tambe pa hende grandi ya cu nan tambe ta gusta mangel.
Mirando cu FADA semper a traha di cerca cu Cuerpo Policial, FADA di nan parti lo manda un carta y lo contact nan pa asina nan tur traha hunto ya cu ta importante pa Cuerpo Policial tambe ta na altura ya cu nan tambe ta sigui tur e noticianan aki di cerca.
E noticia aki a cuminsa na Miami, pero poco poco e noticia ta plama na otro parti mundo. FADA semper ta zorg pa tur hende cu nan ta traha cun’e ta bon informa, p.e. Douane y Cuerpo Policial.
FADA ta keda ripiti, na cada charla cu nan bay, pa please papia cu nan yiunan. Pa no tuma nada di niun hende, y si bo no conoce e persona aki pio ainda. SI un persona dunabo algo, bay di biaha cerca un docente, of e cabesante di scol informa nan di kico ta pasando.
Sra. Rulienne Arends ta pidi e docentenan pa si un alumno bin cu un mangel of algo straño pa bisa esaki na e cabesante pa esaki tuma contacto cu e instancianan concerni. Durante charlanan, hopi biaha casonan ta bin dilanti di eventonan cu nan ta parti cierto tipo di mangel cu despues esunnan cu a come esaki, ta bay hospital. Ta importante pa informa e instancianan concerni, pa nan tambe ta na altura di esaki