Den cuadro di e actividadnan di Luna di Enseñansa, Minister di Enseñansa Michelle Hooyboer-Winklaar a tene un rueda hunto cu diferente partners cu ta participa den e eventonan di e luna aki. Diferente instancia relaciona cu Enseñansa a colabora pa hunto organisa diferente actividad. Durante e presentacion varios representantenan a comparti informacion relaciona cu nan evento. Durante e luna lo comunica detayenan di cada un.
Un di e eventonan cu ta tuma luga e luna aki ta e evento Appel di Oro. Sharine Croes di Departamento Di Enseñansa encarga cu e proyecto Appel di Oro a duna di conoce cu tabatin mas nominacion cu aña pasa. Aña pasa tabata tin 60 nominacion y e aña aki a yega na 371 nominacion. Kitando e nominacionnan dobel a yega na un total di 152 persona nomina.
Recientemente e huradonan a sinta hunto y a pasa door di tur e nominacionnan y a haci un pre-seleccion pa despues haci entrevista y selecta e ganado. Banda di esaki, un otro participante den e Luna di Enseñansa ta Biblioteca Nacional. Astrid Britten, directora di BNA, a informa cu nan ta participa riba e parti di digitalisacion y tambe pa e muchanan haya e motivacion pa programa alabes di e “Hour of Code”.
Biblioteca Nacional Arubano (BNA) ta participa cu dos actividad. Dia 4 di October lo tin e “Tablet Cafe” cu tin enfasis riba nos grandinan 60 Plus. Tambe lo tin apertura di e di 24 Festival di Buki cual lo ta dia 28 di October di 6:00pm pa 8:00pm. E festival tin como meta e muchanan di 4 pa 12 aña unda ta inculca den nan e habilidad pa lesamento cual nan ta uz’e despues durante henter nan bida, Britten a subraya.
Dilma Arends di Fundacion Autismo Aruba a agrega cu nan tin dos evento un ta tuma luga dia 27 di October na Biblioteca Nacional di 6:00pm pa 8:00pm. E anochi lo ta un charla cu hopi informacion y tips dedica na tur maestro cu ta interesa. Y e otro evento lo ta dia 5 di November na Neptali Henriquez Park hunto cu Fundacion Pa Nos Muchanan. E dia aki lo duna training na leidsters trahando den kinderopvang. E dos persona cu ta bay duna e curso aki ta miembronan di directiva di e Fundacion.
Di parti di Fundacion Bon Nochi Drumi Dushi e luna aki di enseñansa lo enfoca riba lesamento na cas cu e lesadonan boluntario ta haci. For di awor caba por tuma contacto cu e fundacion pa medio di nan Facebook Page, website of via di email of tambe na Biblioteca Nacional unda tin foyeto y formularionan.
Rosemary Provence hunto cu Emerita Emerencia di Muchila Creativo a informa cu nan lo tin evento di arte combina cu cultura unda e hobennan por “think out of the box” y bin cu bon ideanan. E evento aki lo ta pafo di scol hunto cu comunidad. E festival di arte y cultura lo tuma luga dia 29 di October den Centro di Oranjestad entre 4:00pm y 10:00pm unda lo pone enfasis riba interaccion.
Directora di IPA, Marilyn Richardson a informa cu nan ta participa den e Carousel di Enseñansa. Tambe lo tin un otro actividad dia 14 cual ta dirigi na studiante y personal di IPA cu enfoke riba “sense of community” di IPA.
Durante Carousel di Enseñansa Smart School tambe lo tin su booth di cual e team di Hour of code bou liderazgo di Aruba Digital System Viviana Carraha cu colaboracion di Setar sr Ivo Dongen lo ta presente dia 10 di October na e booth aki, pa asina duna tur maestro interesa mas informacion. Hour of Code lo tuma lugar den e prome siman di December 2016.
Finalmente, Tienda di Educacion a duna di conoce cu e aña aki nan ta organisa atrobe un charla pa mayornan. Lanta, cria bo yiu no ta tur ora facil. E meta ta pa conscientisa e mayornan y duna sosten riba e topico aki y tambe riba e topico di educacion sexual. E charla aki lo tuma luga dia 24 di October di 7:00pm pa 9:00pm na Biblioteca Nacional.
Minister di Enseñansa Michelle Hooyboer-Winklaar ta invita un y tur na e actividadnan informativo y interesante cu lo tuma luga durante Luna di Enseñansa. Pa mas informacion riba e actividadnan y pa registra por bishita e Facebook Page: Education Month Aruba of website www.ea.aw/luna-di-ensenansa