Ya nos conoce caso cu tin hende cu a keda sentencia pa corte pa loke ta e falta di incomplimento di entregamento di inkomstenbelasting pa cual aki Sra. Meverly Romano ta splica riba e cifranan di hende cu no ta cumpli.
Ainda tin un cantidad hopi grandi di personana cu a entrega nan declaracion. Ta papia aki di 17.659 cliente of declaracion cu a keda entrega. Pero di otro banda, SIAD tin un total di 19.392 declaracion cu no ta entrega ainda. Esaki ta un cantidad hopi halto, e ta representa mas di mita di e cantidad di declaracion entrega.
Tin tres luna mas pa bay, prome cu e deadline yega. Tur hende a haya seis luna, a pesar cu e 6 luna no a yega ainda, SIAD kier a recorda e clientenan pa no tarda mucho mas cu e entregamento di e declaracion di inkomstenbelasting. E grupo cu a entrega caba di 17.659 SIAD ta hopi gradicido cu nan a cumpli caba cu nan declaracion, pero SIAD kier mira 100% cumpli cu e declaracion. Na e momentonan aki tin mas di 19 mil cliente cu falta pa entrega nan declaracion y ta hopi importante pa recordanan cu nan tin solamente 3 luna mas, ya cu e declaracion mester ta entrega pa dia 1 di Juni.
E tempo ta bayendo rapidamente y ta hopi importante pa recorda e clientenan pa no warda mucho mas, no keda pospone e entregamento di e declaracion ya cu esaki ta hopi importante. SIAD ta na altura cu tin hopi hende cu tin dificultad pa yena nan aangifte, y SIAD no solamente a tene nan campaña di ayudo, pero tur fin di luna desde di November SIAD ta yudando e cliente.
E atendencia di e campaña aki, e no tabata suficiente halto. SI mira cu tin mas di 19 mil cliente cu falta pa entrega nan declaracion y brindando e ayudo, toch e atendencia no ta halto, ta duna di compronde cu kisas e cliente no ta worry mucho pa entrega su declaracion.
Na momento cu e cliente entrega su declaracion y vooral esunnan cu ta spera di haya un restitucion bek, ta importante pa sa cu Departamento di Impuesto ta procesa e declaracionnan segun e fecha di entregamento. Dus e clientenan cu entrega mas prome, nan ta wordo procesa mas lihe. Dus e cliente cu ta wardando ariba restitucion, tin chance di hay’e mas lihe, si e entrega su declaracion mas lihe. E ta nifica tambe, cu mas trempan e cliente entrega su declaracion, mas lihe e ta haya su placa bek.
E fecha di 1 di Juni ta e fecha final, despues di e 6 lunanan duna ya caba. SIAD lo no duna mas uitstel, despues die esey no tin mas tempo pa entrega e declaracion. Pesey ta pidi pa tur cliente y tur consehero fiscal, pa tene cuenta cu esey.
Sra. Romano a splica cu tin un cantidad grandi di clientenan cu mester entrega nan decalracion, y e rij pa warda despues ta bira largo. E tempo di espera ta bira largo. SIAD sa cu su clientenan ta gusta warda te na ultimo. Pero no ta recomendabel pa haci esey. Mas lihe e entrega su formulario, mas lihe e ta keda cla tambe. Asina Sra. Meverly Romano, vocero di SIAD a finalisa bisando.