Comunidad no a keda mucho contento cu e sentencia den e caso Speeltuin. Casonan asina e castigo no ta yega. Minister di Husticia, mr. Andin Bikker ta elabora ariba e castigonan cu ta wordo duna den casonan extremo, manera esun Speeltuin den su rol como hurista, abogado y awo parlamentario.
E mandatario a splica cu e ta compronde e preocupacion y e frustracion cu di cada caso por tin den comunidad. Sin embargo nan rol den un estado di derecho ta lo siguiente: Ministerio di Husticia y gobierno, hunto cu parlamento ta traha leynan y ta determina e strafnan. Ministerio di Husticia por determina tambe, conhuntamente cu Ministerio Publico, e strafmaat, con nan por pidi e castigonan, pero te eynan. Dado momento, den casonan individual ta Corte ta evalua, a base di e peticion pa loke ta trata Ministerio Publico, y teniendo na cuenta cu tur e circunstancianan, ki tipo di straf nan ta duna. For di eynan, Ministerio Publico tin e libertad y tambe e acusado, tin e libertad di bay den apelacion. Den caso specifico, a bin ta evaluando, pa conhuntamente cu parlamento, si ta bin cu castigonan minimo.
Tin un concepto di ley aworaki, pa cu esaki. Los di e esey, ministerio di Husticia, ta bay ta den reunion cu ministerio publico pa e richtlijn (guideline) di e strafmaat pa nan por refleha e indignacion y e shock cu comunidad ta sinti pa cu cierto crimennan. Ministerio di Husticia lo tuma e pasonan ey, pero semper respetando e podernan separa cu nos sistema hudicial tin, unda cu corte y Ministerio Publico ta independiente.
E mandatario a sigui bisa cu e castigo ta e parti represivo despues di cu e delito a tuma luga. Eigenlijk loke e gobierno aki ta poniendo hopi focus ariba dje, ta e hecho cu nan kier preveni cu tipo di casonan asina tuma luga. Loke a tuma luga den e caso aki, conoci como Speeltuin ta resultado di un negligencia di 8 aña largo, caminda cu tin evidencia cu a wordo recorta hopi riba presupuestonan substancialmente, caminda cu a bin resulta cu tabata tin diferente listanan di espera, p.e. na Voogdrijraad, aspectoann social cu no a haya e atencion debido.
Na november a haya un experiencia hopi amargo di wak con neglisha e ambito di sector social tabata ta. E crisis plan social ta mas enfoca ariba prevencion pa e cosnan aki wordo evita y claro, represivamente, y si algo asina bolbe tuma luga, e ora pa e castigo pidi door di Ministerio Publico ta refleha e shock di comunidad, segun e mandatario di husticia, Sr.mr. Andin Bikker.