Actualmente Aruba ta pasando den un periodo no usual den cual tin un crecemento den casonan raporta di diarea combina cu sacamento, specialmente bou di baby y mucha chikito. Mayoria di e casonan raporta door di Hospital ta den e edad di 1 pa 4 aña y e causa principal ta Rotavirus, confirma door di laboratorio. Deshidratacion ta e motibo principal pa hospitalisacion y e averahe di dianan interna ta 2 pa 3 dia.
E sintomanan ta diarea, keintura, sacamento y tin biaha dolor di barica. Rotavirus ta wordo transmiti via boca door di mannan, obhetonan, cuminda y bebida contamina cu e pupu di un persona infecta. E luganan mas comun pa transmision ta na cas, crèche y na scol.
Baby y mucha chikito por transmiti e Rotavirus te cu 1 siman despues cu diarea cuminsa. E enfermedad ta auto limita y e miho forma pa evita e enfermedad ta door di tuma medidanan preventivo. Corda den caso di un baby of mucha chikito cu tin diarea y sacamento, pa mantene e higiena general. Esey kiermen pa laba mannan bon cu habon y mantene tur obheto “posiblemente” contamina, limpi door di practica bon saneamento. Laba e frutanan y berduranan bon cu awa prome cu duna e baby of mucha pa come.
Si e baby of mucha chikito ta saca y/of pasa diarea 4 of mas biaha den un dia, yama su dokter di cas pa un cita y haci lo maximo pa tene e criatura na cas. No hiba un baby cu diarea y sacamento crèche ni hiba un mucha chikito cu diarea y sacamento crèche of scol.
E enfermedad no por wordo trata cu antibiotica. Ta sumamente importante pa mantene e baby of mucha chikito cu diarea y sacamento bon hidrata door di duna likido pa bebe manera Lechi di Pecho, Pedia Light y awa. Evita di duna e baby of mucha chikito cu diarea y sacamento likido cu sucu pa bebe, manera bebida energetico, juice di fruta artificial of cu sucu y softdrink.