Stichting Bloedbank Aruba a participa den Expo Beauty, pasobra nan ta buscando mas dunado di sanger. Pa añanan Stichting Bloedbank Aruba ta haciendo campañanan pa asina haya dunado di sanger, pero mundialmente World Health Organization ta puntra pa 5% di e poblacion pa ta dunado y pa Aruba esey ta un cantidad di mas of menos 4800 persona. Te cu awo tin un total di 1800 cliente y pa yega na e meta principal aki Stichting Bloedbank Aruba tabata na e Expo pa purba recluta mas dunado di sanger.
E motibo ta cu di e 1800 no por uza 900 pasobra nan a caba di duna sanger y e otro 900 mester cubri mas di 100 mil persona aki na Aruba. E presion pa dunado di sanger pa aña tambe ta subi, asina vocero di Stichting Bloedbank Aruba, Raymond Maxwell a expresa. Un dunado eigenlijk mester bay 1 bes pa aña pero na e momentonan aki e dunadonan ta bay 3 pa 4 biaha pa aña. Esey a haci cu e fundacion a pone como meta pa presenta na e Expo Beauty pa por conscientisa pueblo di Aruba pa yuda nan prohimo.
Durante e Expo Beauty e fundacion a haya por lo menos 200 dunado potencial, pero di cual 25% semper nan lo keda di e dunadonan potencial. Nan lo keda cu 45 pa 50 persona pasobra asina cu bay via e procedura di mira tur rekisito, tin di nan lo cay afo. Esaki ta pasobra tin diferente motibo cu nan ta cay afo sea cu a haya stroke, otro ta uza remedi pa schildklier, tin cu a haci bypass.
Rekisitonan pa un persona bira un dunado di sanger ta cu e mester ta bon di salud; mester tin 18 aña; mester tin un peso di mas cu 50 kilo y mester biba un bida hopi saludabel, pasobra e calidad di sanger ta cuminsa cerca e dunado. E fundacion ta spera cu tur dunado di sanger ta biba un bida responsabel. Tin un idea robes cu hendenan cu tattoo no por ta un dunado di sanger. E fundacion ta aclaria cu esey no ta e caso, solamente cu ora haci e tattoo mester warda 4 luna y despues por duna sanger atrobe.
Un persona cu ta desea di bira un dunado di sanger mester tuma contacto cu e fundacion na telefon 5870002 pa un cita. Stichting Bloedbank Aruba no ta traha cu e sistema cu hendenan por djis cana drenta. Asina cu e persona tin su cita, trahado di Stichting Bloedbank Aruba lo pasa riba un lista di preguntanan. Si tur cos sali bon riba e lista di preguntanan, despues di 2 luna e persona ta bay cerca un dokter pa haci un keuring y a base di e resultado ey, e persona por bira un dunado di sanger. Ta dura mas o menos 4 luna prome cu un persona por bira un dunado di sanger.
“Mi kier conscientisa pueblo di Aruba riba e necesidad grandi pa duna sanger. Ora un hende, baby, ser keri bira malo y mester di sanger, hopi biaha nan ta yama pidi pa sanger y ta hay’e”, Raymond Maxwell a indica. Si tin sanger den e banco di sanger por scapa bida di esun cu mester di dje. Yama y bira un dunado di sanger pa scapa un bida. Be a life saver!