Segun Mr. Andin Bikker, cu e ola criminalidad na Aruba ta for di control lamentablemte ta un hecho. Sinembargo te ainda no a tuma nota cu Minister di Husticia kier acepta esaki, e ta trata mas bien via di press release pinta diferente situacion preocupante, bunita. Te na e momento nan aki e radar ta trahando, pero tin indicacion cu e no ta trahando completamente debi cu tin diferente spotnan na costa di Aruba cu e radar no tin bista riba dje, Parlamentario mr. Andin Bikker ta añadi. Tambe por a tuma nota di e supuesto estadisticanan cu e mandatario ta purba sconde tras di dje, pero pa Parlamentario Andin Bikker loke ta importante ta e realidad cu ta biba den cada cas di nos Pueblo, esta e miedo cu tin, e preocupacionnan cu tin den cada hogar y negoshi pa cu e inseguridad reinante.
Aruba tabata un pais caminda ciudadanonan por a biba cu bentana habri, despues di tempo esey no tabata posibel mas, awendia esaki no ta existi mas debi cu hasta te den bo cas antisocialnan ta bin y kibra bo privacidad y haci daño, locual pa Bikker ta inaceptabel.
Parlamentario Andin Bikker kier recorda Minister di Husticia cu entre otro den e comision di husticia a yega di haya un presentacion den Parlamento y e cifranan ta publico cu na 2016 tabatin como 60 atraco, cual ja tabata un record. Pa aña 2017 te na e momentonan aki cu nos ta mita di aña 2017 y ja caba a pasa 50 atraco na Juni! Mirando esaki falta ainda 6 luna pa aña caba y nos ta na mucho mas cu mita di e atraconan cu a tuma luga aña pasa.
Parlamentario Andin Bikker ta kere mirando e situacion delicado cu Aruba ta den dje ta mustra cu Minister di husticia no kier mira e realidad of e no ta biba den realidad y ta biba den politica di avestruz, e no kier compronde cu e Pueblo ta sufriendo eyfo. E situacion di criminalidad no ta toca solamente na e Pueblo pero tambe e comerciante y e bishitantenan cu ta bin pasa nan vakantie na Aruba.
Banda di tur e problemanan aki Minister di Husticia a demostra cu e ta incapacita debi cu den 8 aña di gobernacion no a mustra di tin un plan concreto y efectivo pa cu husticia. Esaki ta mustra cu e mandatario no por mustra un vision cu e tin. Minister di Husticia a haya e honor y confiansa di pueblo pa sirbi dos termino constitucional y den e 8 aña nan aki no por a presenta un plan pa frena e criminalidad cu ta asotando Aruba.
Actualmente por a tuma nota cu e Minister di Husticia a re-postula su mes y ta pretende cu Pueblo lo por soporta 12 aña largo di su mal maneho, ya cu e ta hibando e pa 8 aña largo caba. Parlamentario Andin Bikker ta puntra su mes ta unda mas falta pa criminalidad bati na porta pa Minister di Husticia realisa cu e no ta e persona capacita pa ta Minister di Husticia di Aruba.