Na momento cu un pashent mester bay haya un tratamento den exterior, tin diferente factor cu AZV mester tene cuenta cu ne. Y pa hopi di esaki AZV ta depende di e nivel di urgencia cu e caso ta pa e specialist y e situacion reinante na e pais unda mester manda hende. Aworaki tin mas cu 200 pashent pendiente pa bay Colombia, pero e parti positivo ta cu frontera ta habri y poco poco ta cuminsa manda e pashentnan..
Solange Tchong, relacionista publico di AZV, a splica cu tur cuido medico den exterior mester cana su proceso. Den tur caso, ta e specialist ta esun cu ta haci e peticion pa manda un persona pa sigui un tratamento den exterior.
E situacion actual di pandemia ta haci cu mester tene cuenta cu otro factornan tambe na momento di dicidi pa manda hende afo. Den casonan di cancer si ta mandando e hendenan pa exterior.
E proceso o normal ta cu e specialista ta duna indicacion con lihe e kier pa e pashent wordo manda afo pa haya su tratamento. E ta depende den ki fase e malesa ta.
Un di e retonan cu nan ta confronta ta cu ainda e nivel di contagio di COVID ta hopi halto na Colombia. A pesar di esey, cada biaha ta depende di disponibilidad di espacio disponibel pa atende cu e pashentan. E retonan a causa cu e lista di espera a subi un poco compara cu antes. Aworaki tin 203 pashent cu ta pendiente pa tratamento di Colombia, unda cu e cifra di contagio ta halto (25 pa 30 mil caso di COVID pa dia). Esaki ta influencia e disponibilidad di cama.
A papia cu Fundacion Valle de Lilli, Fundacion Santa Fe de Bogota y otronan, cu tin espacio. Pero mester keda den contacto pa wak con lihe por duna Aruba espacio y atende e pashentnan. Si antes por manda e pashentnan den dos dia, awor e ta dura un tiki mas largo, debi na e regulacionnan cu tin cu pasa aden. A pesar di e retonan, a logra cuminsa manda pashent pasobra fronteranan cu Colombia a habri. Pues, a logra baha e lista di espera un poco caba.
E ta un proceso cu mester cana y den cual tur esnan envolvi mester tin e pasenshi pa controla of realisa cada paso manera describi den ley. E tardansa aworaki no ta algo cu AZV a experencia den pasado. Normal ta tur diaranson e comision ta reuni pa dicidi kende ta bay y ki dia.
Di otro banda tur cos ta andando pa e cuido medico general sigui, manera cu e pueblo tabata custumbra cu ne prome cu COVID. E intencion ta pa elimina tur e retrasonan.