E desaroyonan pa drecha waf di Oranjesad ta riba un bon caminda si mira loke ta e cambionan cu ta wordo haci pa yegada di e turista segun Sr. Jossy Figaroa, Director di APA a splica.
No por sigui crece sin limite. Tin plannan pa bin cu mas waf. Si bo tin na mesun momento, 11 pa 12 mil turista, esaki ta suficiente, sino bo ta bay congestiona bo waf y Aruba. Bo tin mucho mas bus pa transporta nos hendenan. Turistanan Europeo no ta gusta pa tin masa di hende den waf.
Gobierno a drecha dilanti waf cu diferento kiosco, y pronto esakinan lo habri. Turistanan na pia, ta bay sali na e edificio di Markthall. Tabata tin pensa di benta esaki abao, y traha algo otro. Pero a opta pa lag’e edificio.
Sr. Figaroa a sigui bisa cu tin dos proyecto andando simultaneamento, e edificio di Markthall y entrada na unda ta bay haya un edificio no grandi, unda cu nan por pasa bou di dje y sali. E porta ta traha caba. E ta bay ta den e verlenging di e caminda cu ta pasa mei mei di e kiosco. Di parti di e comision, sigur ta trahando ariba dje.
Busnan lo sigui sali cerca di edificio di APA, y e peatonan lo sali na un otro caminda. Locual cu ta bay haci, dus e barconan cu ta bay para na unda tabata e waf di container, e hendenan lo sali un poco mas leu. Turistanan cu ta bay cu tour, ta prefera pa e bus ta mas cerca posibel.
Plannan cu tin te awo, dus e manera cu ta bay regla e fluho con ta bay atende cu e turistanan cu ta yega nos isla, tin atencion di APA.
Lo no bay traha mas terminal, loke lo bay traha ta mas cosnan unda cu e turista ta sinti su mes comodo. Capitannan di barco no ta gusta wafnan cu ta yena cu edifcio. Y esey APA lo bay haci tambe. Dilanti e waf di container, no tin pensa di traha un edificio grandi, pero si e turistanan cu ta baha, tin e facilidad pa regla nan asuntonan. E ta bay ta bon delinea, cu e turistanan lo sa unda ta nan salida.
APA ta haya masha hopi yamada pa nan haya un di e kiosconan, pero nan ta cay bou gobierno. Pero tin mas peticion cu tin espacio. Y esunnan cu tabata tin kiosco otro banda di
caminda, ta bin mas lihe na remarca pa haya uno, cu un otro persona.
Locual cu APA ta spera cu e doñonan di kiosco no pone nan mercancia pafo, strobando e turista di cana y forsa e turista pa e cumnra. Cada biaha cu ta haci algo, mester wak pa e turista cu ta bin, pa e sinti su mes comfortabel, pa e no sinti cu ta core su tras pa e cumpra algo.
Aunke compara cu otro islanan, Aruba tin e situacon bou control, unda cu no ta forsa e turista pa cumpra, segun Sr. Jossy Figaroa, director di APA.
Tin un grupo di tour operator, ATOA, cu tin un booth ariba waf unda cu e turista por bin y haya su tour. E liñanan di crucero no ta gusta e idea ey hopi. Nan ta gana placa tambe cu e tour cu nan ta book abordo di e barco.
E liñanan crucero ta haya cu Aruba mester yuda nan bende mas tour ariba e barco, dus cuanto e turista ta paga na ticket pa e bin Aruba, cuanto nan mes ta gana cu e turista ey abordo. Dus locual cu e ta cumpra abordo y tambe e tournan. Pa ora e ta na Aruba, pa su experiencia ta bon, nan ta haya mas turista cu ta bisa cu nan kier bin.
For di encuestanan, ta resalta cu Aruba tin hopi repeater. Nan ta scoge iterenarionan cu Aruba ta forma parti di dje. Loke ta trahando ariba dje, ta pa traha ariba nos mesun iterinario, hunto cu Corsou, Cartagena y Republica Dominicano, unda ta ofrece e itinerario ey. Si e ta bon, aki 4 siman lo tin un reunion di e grupo aki na Aruba pa trata esaki.
Por ultimo, Sr. Jossy Figaroa, director di APA a splica cu tin peticion di Panama tambe, pa hunto cu Aruba y Corsou, y kisas Bonaire tambe, saca un itinerario cu ta inclui Panama y esaki ta interesante tambe. Y lo traha ariba dje, ya cu e canal di Panama ta hopi grandi y hopi hende lo kier pasa door di dje. Dus e siguiente cu ta bay traha ariba dje, ta hunto cu Panama.