Neiffy Kock, director di e creche “Pasa Dushi Pasa Pret”, lo keda deteni pa 30 dia mas. Kock, hunto cu su casa, ta deteni desde dia prome di juni.
Recientemente a revela cu e sospechosonan aki, hunto cu un empleado mas di e creche,i ta envolvi den un caso serio di maltrato di mucha. Fuera di esey, e trahado en cuestion tabata traha sin permiso di residencia of di trabao. A arest’e y deporte. Pues e no a sinta castigo.
E investigacion, cu tin varios siman andando, ta enfoca riba un caso grave di maltrato di mucha cu a sosode n’e creche “Pasa Dushi Pasa Pret” na Primavera, caminda cu a dal un mucha intencionalmente y e acto aki a wordo graba cu un celular.
E imagennan y e voicenotenan a wordo difundi manera pan cayente, desencadenando un investigacion inmediato y tambe un ola di disgusto den comunidad. JZP a realisa un entrada hudicial n’e creche, arestando e sospechosonan, incluyendo e director y su casa. Fiscal tambe a participa den e operacion.
Durante e “inval”, a confisca dos celular cu a proporciona prueba esencial relaciona cu maltrato di mucha, incluyendo grabacio di video.
Creche “Pasa Dushi Pasa Pret” ya tabata den noticia na 2022, debi na morto sospechoso di un baby, loke a provoca un investigacion grandi. Hasta un conferencia di prensa a tuma luga, p’asina nan desmenti tur acusacion y tambe hustificando nan accionnan.
Awo, e mesun creche ta bolbe ta den noticia pa un caso negativo di maltrato di mucha, e biaha aki cu prueba visual.
Ta importante destaca cu riba e rednan social, hopi mayor y miembro di e comunidad di Aruba ta extremadamente indigna p’e incidente y ta exigi consecuencia p’e responsabelnan. Aunke e caso aki tin dos siman caba andando, e indignacion ta sigui ta halto y ta pidi castigo p’e culpabelnan.
E pruebanan ta cla y contundente y e maltrato ta severo y traumatico tanto p’e mucha como p’e mayornan. Un creche cu mester brinda confiansa y siguridad p’e muchanan, a opta pa abuso y negligencia p’e chikitonan cu no por defende nan mes ni expresa loke nan ta sinti.
Awo tin di bisa, despues di tanto scondemento, e puyitonan a sali for di e macuto, tur berdad a sali na cla y awo e acusadonan, mester enfrenta e consecuencianan di nan acto.
Mientrastanto, noticia di ultimo ora cu nos a ricibi ta cu e di dos persona deteni desde final di mei, a wordo hiba Hues Comisario. Keda pendiente pa mas informacion riba e caso aki.