MANILA, Filipinas- Mientras cu Merca y mundo henter ta pendiente di horcan Florence y e daño cu e lo ocasiona na North & South Carolina, paisnan Asiatico ta pendiente di tifon Mangkhut.
Mangkhut ta un tifon potencialmente mas peligroso cu Florence, y segun prediccionnan el a yega Filipinas diasabra prome cu e avansa na zuid di China, Vietnam y Laos.
E tifon Mangkhut a subi tera diasabra den oranan di marduga (hora local) den e costa noord-oost di e isla Luzon, cu ta forma parti di e archipielago di Filipinas. Esaki a wordo confirma pa autoridadnan local.
Door di e peliger, autoridadnan local ya caba a procede na evacua miles di persona cu ta habita den e zonanan costero y islanan chikito. Mangkhut ta e di 15 ciclon tropical cu ta asota Filipinas den 2018. E pais ta ricibi un promedio di 20 ciclon pa aña.
E forsa y velocidad di su bientonan sosteni ta haci cu e tifon ta ekivalente na un horcan categoria 3 riba e scala Saffir- Simpson cu ta uza pa midi e tormentanan den oceano Atlantico y Pacifico Norte.
Ta spera cu Mangkhut ta “mas grandi, mas fuerte y mas peligroso” cu Florence, aunke e daño comparativo di e dos tormentanna ta depende di unda nan yega. Cualkier impacto directo cu tera lo tin resultadonan mas significativo y destructivo di super tifon debi na su tamaño y intensidad.
Sin embargo, debi na cu e costa west di Merca tin un infrastrecutra mas costoso cu zuid-oost Asia, ta probabel cu Florence causa mas daño na propiedad. Por ehempel, varios planta di energia nuclear ta riba e caminda di Florence, segun e pronosticonan. Den cualkier caso, Mangkut ta presenta un menasa mas serio pa bida, ya cu e lo afecta e bientonan mas fuerte den un area mas grandi y lo tin olanan di ciclon mucho mas grandi tambe.