NEW YORK, Merca- E naturalesa di su relacion no ta mucho cla. E tabata amor of simplemente sex scondi? Nan a seduci otro y nan a uza otro? Of tabata un romance sincero? E investigacion ta den pleno proceso. E presitigioso corante The New York Times no ta compronde ainda con algo asina basico pa su manual di etica por a sosode: niun di su periodistanan no mag di ta envolvi sentimentalmente cu’n fuente.
Tur cos a cuminsa na final di 2013, ora cu e periodista Ali Watkins (26 aña) y e senador James A. Wolfe (58 años), un miembro permanente di e Comite di Inteligencia di e Senado Mericano, a cuminsa un relacion intimo y scondi, leu di e vida publico. Tabata un relacion di tres aña cu nan a logra mantene scondi.
Pero el a wordo descubri pa FBI. Y e scandal no a tarda mucho pa escala te pone The New York Times den un posicion incomodo. Dia 7 di Juni ultimo e organismo aki a acusa Wolfe di a duna testimonio falso. Esaki door cu e senador a gaña den su declaracion durante e investigacion di e interferencia Ruso den e ultimo eleccionnan.
FBI tabata kier a sa si e filtracionnan riba e trabao di e Comité lo a sali for di su boca. Ora cu el a wordo consulta lunanan atrás riba si e tabata conoce dos periodista, e parlamentario a nenga esaki rotundamente. Sin embargo, despues algun potret di nan dos a sali na cla den situacionnan no precisamente profesional.
Ora cu esaki a sali na cla y e ta wordo acusa atrobe pa e oficina federal Mericano, Wolffe a bolbe defende su mes. E biaha aki no pa desmenti su relacion cu Watkins, sino pa protesta cu e ta wordo vincula cu e filtracionnan.
E relacion entre ambos a wordo descubri pa e investigadonan di un manera polemico. Tabata despues di cu e Departamento di Husticia di merca a duna ordo pa secuestra e telefon celular di e periodista, algo cu ta viola su secreto profesional y cu a causa indignacion y repudio di e institucion cu ta defende libertad di prensa rond mundo.
segun The Washington Post, Wolfe tabata lider di e Comite di Inteligencia di Senado durante hopi aña. Ora cu el a ocupa e posicion clave den Senado di Merca e tabata tin acceso na material clasifica di CIA, FBI y otro agencianan di inteligencia Mericano. E informacion cu a pasa den su man y su wowonan, tabata esunann di mas sensitivo den e ultimo decadanan.
Awo e ta enfrenta cargo di fitlracion di e informacion aki. E investigacion a descubri cu durante tur e tempo aki nan a mantene un relacion prohibi, tabata intercambia miles y miles di SMS, WhatsApp, email y mensahenan encripta. Tur a wordo manda entre 2014 y 2017.
Den un comunicado, Watkins a señaló: “Mi ta lamenta sinceramente di a pone The NEw York Times den un posicion dificil. Mi ta gradicido pa e apoyo cu mi a ricibi di mi editornan y mi coleganan akinan. Tambe mi ta aprecia e conclusion di revision di cu mi informenan tabata basa ariba hechonan”.