E federacion di basketball lo organisa diadomingo awor un actvidad pa tur mucha den e edad di 6 – 14 aña pa mucha muher y mucha homber. E evento lo ta di 9or di mainta pa 12or di merdia y lo tuma lugar den Centro Deportivo Playa (Gymzaal Colegio Arubano Oranjestad). Ta premira cu lo tin un bon atendencia ya cu e interes ta mustra uno grandi.
Mester bisa cu e Basketball Jamboree su meta ta pa atrae tur hoben cu ta desea di praktica e deporte di basketball pa nan por bini y sinja e diferente tecnicanan basico di e deporte di basketball manera “passing” “dribbel” y “shooting”. Mas cu claro si e muchanan gusta e dia di e Basketball Jamboree nan lo por afilia nan mes na un club di basketball. Na final di dia tur mucha lo haya un flyer cu informacion di e diferente clubnan di basketball na Aruba di cual nan por bira miembro. Sin duda esaki ta un tremendo iniciativa pa purba na haya mas mucha prakitca e deporte di basketball.
Den e ultimo añanan e deporte a crece y principalmente nos basketbolistanan hoben a haya e oportunidaddi hunga torneonan den exterior unda nan ta gana mas experiencia. Aki nos por mira cu e federacion di basketball ta traha duro na bienestar di nan atletanan.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di basketball enconexion cu e ASU Olimpiada 2017.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.