A combersa Director di Arubus, Sr. Edwin Mohamed despues di algun simannan di ahuste na e busnan nobo cu pronto ta bay subi caya y por a tuma nota cu recientemente Arubus a dicidi pa sali riba caya cu su personal y tambe techniconan. Sr. Mohamed a duna di conoce cu awor si e busnan ta cla pa subi caya caminda cu e prome bus a wordo entrega dor di Jossy Motors na Arubus y na mesun momento ora nan a drenta a dicidi pa haci un “test drive” cu esaki y akinan Masnoticia tambe tabata parti di e “test drive” aki. Segun Sr. Mohammed loke tabata kier a test tabata e parti di e airco dus e ahustenan riba esakinan a keda cla y sa kico pa haci y con pa haci’e.
Basta chauffeur a bay tambe y tambe algun otro hende cu tabata na Arubus tambe p’asina yena e bus cu un cantidad di hende cu lo por “mimic” e cantidad di hende cu lo por ta den un bus na mesun momento. Y ora cu a haci esaki, a bai cu e bus riba Watty Vos Blvd. completamente y a pasa tambe banda di Alhambra y despues a dirigi bek pa Arubus y caminda cu e temperatura tabata y keda agradabel. Pues cada persona den e bus por a sinti nan mes bon den e airco di e bus y alabes a habri e portanan di dilanti y patras p’asina e fluho di aire por drenta y asina wak kico ta e experiencia e ora.
Sr. Mohamed a sigui bisa cu unabes a sera e portanan cu e bus core un distancia largo e temperatura ta baha bek cu 2 grado Celcius. Ora tabata habri e portanan e temperatura tabata subi cu dos grado y na un distancia di 150 meter, e temperatura a baha caba cu 2 grado. E logra haci e test aki den e orario di 11’or di mainta for di Arubus y a yega bek algo pasa di 12’or di merdia y den e solo cayente ey caminda pafor e temperatura tabata marca 32 of 33 grado, e temperatura paden na e momentonan ey tabata 22 grado. Asina mes, segun Sr. Mohamed, e ruta no tabata dje largo ey mientras cu sigur si coy un ruta mas largo e temperatura lo baha mas ainda. Pero mirando cu e tabata 22 grado, asina mes e temperatura den full e bus tabata agradabel y placentero pa tur hende y Sr. Mohamed mes a puntra cada uno di nan pa nan opinion. Nan tur a duna un bista ora di baha con nan experiencia tabata coriendo den e bus cu airco ta fria bon y nan tur a mustra cu e experiencia tabata agradabel. E director di Arubus kier a gradici Jossy Motors pa e ahustenan cu nan a haci na e airconan y muy pronto kisas pa otro siman lo bay ta sacando e busnan aki riba caminda.