Departamento di Infrastructura y Planificacion (DIP) mescos cu tur instancia a sinti efecto di pandemia. Esaki a causa cu nan a cay atras den servicio pa motibo di no por atende hende mas na e oficina. Esaki a cay cu practicamente 50%.
A consecuencia di e cambio di servicio aki, mester a cuminsa na automatisa nan proceduranan, ing. Haime Croes, director, a splica. A pone un website pa cita y awo a base di loke a duna na cita, por bisa cu nan ta ocupa te cu fin di juni caba. Prome cu esey no tin espacio disponibel mas. No mester lubida cu ta tuma mita di e cantidad di hendenan cu ta atende antes debi na protocol di DVG cu mester mantene nan mes na dje.
No solamente e servicio a reduci door di e pandemia y cambionan cu mester a haci pa atende hende, pero tambe tabatin persona interno contagia (brote) cu tambe a afecta nan servicio.
No tin tereno mas
E pandemia a trece problema tambe pa esnan cu a haya e opcion caba pa un tereno. Tin hende a perde trabou of a mira reduccion den entradanan pa cual tin basta peticion pa pone “on hold”. Nan kier pa DIP wanta e peticion te ora cu nan situacion drecha. DIP a wanta pa un aña, pero awo no por wanta pa mucho mas tempo pa cual a duna algun luna extra. Despues di esey no por keda wanta pasobra tin un fila largo di hende wardando ainda pa un tereno (for di 2012 bin ariba). Awo a informa tur hende cu nan tin te cu prome di juni, despues di esey lo pasa tereno pa otro hende.
Ya caba a haci un evaluacion di e terenonan cu tin disponibel, pasobra no tin mucho mas disponibel. DIP ta kere cu pa aki dies aña e poblacion lo yega na mas o menos 130 mil persona. Esaki ta nifica cu den e proximo cinco añanan lo mester yega na un cinco mil cas extra. Pero Aruba awo su capacidad ta 850, y no ta tur ta bay pa construccion di cas.
Croes a splica cu pa guia e pais aki na un forma duradero, ta yega momento cu mester cuminsa construi bay ariba. Den e tipo di proyectonan aki no ta bay duna tereno mas sino ta bay bende unidadnan. Ya caba DIP a haci e tramitenan y a yega na un acuerdo cu un persona. Pa fin di mei lo cuminsa anuncia e unidadnan cu por cumpra.
Tin algun tereno habri, pero mayoria ta situa na San Nicolas. Esnan cu a pidi na 2013 lo por bini na remarca e ora pa unidad en bes di tereno.
E proyecto aki ta un joint venture entre DIP y sector priva. Esun cu a haya e proyecto mester concentra riba e lista di peticion di tereno di 2013 bin ariba.