ORMOC, Filipinas – E instituto geologico di Merca (USGS) a registra diahuebs un temblor di magnitud 6,5 den e centro di Filipinas, sin cu esaki a emiti un alerta di tsunami.
E temblor a desata poco despues di 4’or di atardi (ora local) na un profundidad di 6 km, na 12 km noordoost di e ciudad di Ormoc, riba e isla di Leyte. Inicialmente e instituto a informa di un magnitud 6,9.
Marlon Tano, un agricultor di Leyte, a declara na AFP cu e temblor a pone cay ora cu e tabata riba su cunucu na Borauen, ciudad cercano na e epicentero. “E temblor tabata asina fuerte cu el a ponemi cay,” el a bisa.
Filipinas ta riba e “ring of fire” di Pacifico, region di gran actividad sismico y volcanico, cu ta bay for di Australia pa Alaska y despues ta descende pa e costa occidental Americano te na zuid di Chile.
Na October di 2013, un mortifero temblor di magnitud 7,1 a laga 220 morto riba e islanan den e centro di e archipielago.
Na Februari, un temblor di e magnitud 6,5 a laga ocho morto y mas di 250 herido den e ciudad costero di Surigao, riba e isla di Mindanao (zuid).
E isla di Leyte tambe a wordo devasta na November di 2013 pa e supertifon Haiyan, cu a laga 7350 morto of desaparecido na Filipinas.
Fuente: www.elespectador.com