Presidente di Sindicato STA, sr Diego De Cuba ta duna di conoce e tension fastioso den compania Arubus. Nan a tene un reunion cu gerencia y a pidi pa nan reuni cu nan empleado di delegado pa splica locual ta pasando.
Sinembargo esey no a tuma luga ‘tin cu papia e realidad existente pa asina e trahado por compronde’. Sr. De Cuba ta bisa cu e pandemia aki a bin cu retonan pa Arubus. “Nos tur ta den dje pero por bisa cu e cantidad di pasahero a baha 52% bo sa con e situacion cu ta bayendo no ta bon.”
Arubus ta ser subsidia pa gobierno di Aruba pero mirando e situacion dificil nan lo mester premira con lo habri anja 2021. Tram y AruParking ta cay bou di Arubus, y ambos no ta genera placa. “Mi a yega di menciona esaki cu sindicato STA, hopi lo tuma mi na malo pero e realidad ta cu AruTram ta un cancer cu no ta genera entrada. Un compania cu ta capital vernietiging”, e ta bisa.
Segun sr. De Cuba, e tram nunca mester a bin y a djis crea mas gasto. E ta bisa cu Aruparking lo por tabata un compania cu por a draai mas miho si tabata bon organisa. Pa motibo di e ambos departamento aki ‘Arubus ta sangrando’. E ta remarca cu director di Arubus y gobierno mester tuma e decision sea un un reorganisacion total, otro sistema den e departamento.
“Arubus ta un compania di vital importancia, e ta transporta studiante, hende grandi. Un transporte publico ta bon pa pais y mester concentra riba e compania estatal.”, E ta bisa cu lo ta ideal pa Aruparking y Arutram bira un NV riba nan mes. Pero pa no cay riba Arubus.