Den un entrevista na The Washington Post, Juan Guaido, presidente interino auto proclama di Venezuela, a declara cu oposicion ta combersando cu funcionarionan militar y civil di e pais pa expulsa presidente Nicolas Maduro for di poder. Ya caba durante fin di siman, e coronel Jose Luis Silva Silva a declara cu e ta kibra relacion cu Nicolas Maduro p’asina e apoya Juan Guaido. Algun ora despues Ministerio di Defensa di Venezuela a tweet e video caminda Silva a declara su decertacion usando e palabra “traidor”. E mesun dia, e secretario di estado di Merca, Mike Pompeo a pidi e Conseho di Seguridad di ONU pa reconoce Juan Guaido como presidente interino di Venezuela. Mescos e mesun dia, presidente Nicolas Maduro a declara den un entrevista na CNN Turk cu Juan Guadio ta un di e “titere politico” di Merca. Y ademas cu el a manda varios mensahe pa president Donald Trump, pero no a haya contesta.
Pa loke ta e situacion di e diplomaticonan Venezolano y esnan Mericano den cada pais, e canciyer di Venezuela a bisa cu ambos gobierno a bai di acuerdo pa negocia e establecimento di “seccionnan di interes” den capital di otro pais pa combersa riba temanan migratorio y otro “asuntonan di interes bilateral” den e proximo 30 dianan. Guaido a usa e rednan social un biaha Diadomingo, pero no solamente pa pidi, sino pa duna orden. Y el a dirigi su mes directamente na e militarnan di su pas pa “no tira riba e pueblo Venezolano” cu lo sali manifesta. Tambe el a convoca dos manifestante, uno pa Diaranson awo y otro, cu el a jama “La Gran Movilacion Nacional” pa Diasabra 2 di Februari. For di Panama y despues di finaliza su bishita, Papa Francisco a referi na e crisis politico di Venezuela bisando: “Mi ta pidi Dios pa busca y jega na un solucion husta y pacifico pa supera e crisis, respetando e derechonan humano y deseando bon pa tur habitante di e pais”.
Y despues cu Spaña, Francia, Alemania y Reino Unido declara cu si den 8 dia no anuncia eleccionnan na Venezuela, nan lo reconoce Guaido como presidente, Nicolas Maduro a dicidi pa no warda tanto pa contesta, bisando: “Ningun hende ta pone ultimatum pa nos”. Pues tension ta sigui subi na Venezuela y rond mundo pa cu e ultimo acontesimentonan na e pais bisiña y mas cu claro pa nos tambe mirando cu si bini un intervencion militar, sigur sigur nos aki banda lo bai sinti esaki y kizas hasta biba esaki.