Tension ta sigui crece cu atake entre Israel y Gaza

E tension entre Israeli y Palestinonan a intensifica ora cu militantenan Palestino na Gaz a lansa algun shen cohete contra Israel. E pais aki a reacciona cu atakenan aereo intenso den e parti di costa, mientras cu disturbionan a plama pa ciudad- y pueblonan mas leu cu Jerusalem.

Mientras cu diamars anochi tabatin intercambio di atakenan aereo, prome minister di Israel Benjamin Netanyahu a dirigi su mes na e nacion bisando: “Nos ta memey di un operacion importante”.

E atakenan Israeli na Gaza a laga al menos 35 morto, incluyendo 12 mucha, segun funcionarionan di salud di Palestina. Tambe nan a bisa cu 220 persona a resulta herida, te cu diamars anochi. Ehercito Israeli a bisa cu nan a mata mas cu 15 militante.

Rond di 3’or di marduga (ora di e pais) ciudadanonan a scucha alarma di sirena cu ta alerta di un atake di Palestinonan.

Algun ora despues, ehercito Israeli a informa cu un total di cinco civil a fayece desde inicio di e atake entre Gaza y Israel, cu a cuminsa na inicio di siman.

Durante e atake, un edificio di 13 piso na Gza a cay den otro diamars anochi, despues di un atake aereo Israeli.

Forsanan di Defensa di Israeli (FDI) a bisa den un comunicado cu HAMAS tabata uza varios piso di e edificio, incluyendo tabatin eynan e oficinanan di inteligencia di su ala militar y un unidad di investigacion y desaroyo cu ta traha cu cohete (misilnan).

E militantenan ta bisa cu ta trata di un reaccion riba accionnan di polis Israeli cu a tira granada den e meskita Al Aqsa na Jerusalem, un di e luganan mas sagrado di e ciudad. Esey a sosode dialuna mainta.

Un ciudadano Palestino a bisa cu e “Israelinan a ataca Al Aqsa, durante Ramadan, mientras cu e hendenan tabata resa” y esaki ta loke a irita e hendenan.

Arabenan di Israel a manifesta dialuna y diamars anochi riba caya mustrando solidaridad cu Palestinonan na Gaza y Jerusalem.

Mundo ta pidi calma

 

Merca y Union Europeo a pidi pa baha man cu violencia, mientras cu varios pais di Medio Oriente y Turkia a condena e reaccion di polis Israeli den e tensionnan na Jerusalem.

Un di e principal motibonan di e malcontento den e ultimo dianan ta e intension pa saca varios famia Palestino di nan vivienda den e bario di Sheikh Jarrah na Jerusalem.

Casi mil Palestino a resulta herida na Jerusale Oost y mas di 200 na e parti West, entre 7y 10 di mei, segun Nacionnan Uni.

Comments

comments