Tension ta keda halto na ANSA NV y nan ta lamenta cu e minister di Transporte, Sr. Chris Romero no ta dunando sindicato atencion. Sr. Diego de Cuba, lider di sindicato STA ta elabora ariba esaki.
Locual cu ANSA tin presupuesta pa nan edificio, por wordo uza pa negocia e CAO nobo, cu mtser a drenta na vigor caba na januari 2019. Pero tin un protocol firma, cu tur locual ta e parti financiero lo drenta na vigor cu forsa retroactivo, p’esey a solicita un reunion cu minister Chris Romero.
E reunion aki a wordo pidi dia 31 di januari, cu caracter di urgencia. Pero awe ainda, dia 15 di februari, STA no a haya informacion definitivo ainda di e mandatario. Sr. de CUba a sigui bisa cu nan a haya algun mensahe for di dje, cu e lo sinta cu STA e siman tras di lomba, pero lamentablemente nada a sosode. Esey ta ponenan den un situacion fastioso, mirando cu mester pone prioridad, mirando cu ANSA ta di suma importancia pa pone como prioridad halto di Aruba den su agenda. Pero ta keda na e mandatario, cu si e ta tuma e asunto aki na serio.
Di parti di STA nan ta bisa cu mester bin mas seriedad den e asunto aki, ya cu tin e miembronan/empleadonan di ANSA ta wardando ariba e reunion aki, y ta hopi importante, mirando e trabao cu ANSA ta desplega ariba Aeropuerto di Aruba. Empleadonan ta harta y fada, y ta e delegadonan di STA tin e empleadonan wanta, sino nan lo a bay masha dia caba den un accion di protesta. Pero no ta descarta cualkier accion den e simannan binidero, si e atencion debido no wordo duna na e peticion pa cu e reunion, cu e delegado hunto cu directiva di STA pa cu e situacion di ANSA NV.
STA ta spera cu e siman aki, e minister reaccion ariba nan peticion y cu nan por haya un confirmacion cu e fecha di e reunion, pa e tuma luga e siman aki. Dialuna mayoria departamento di gobierno ta cera, cu ta dos siman cortico. Pero esey no ta kita afo, cu e por kita tempo pa atende asuntonan cu tin prioridad hopi halto.
ANSA aworaki ta un compania priva di gobierno, mescos cu SETAR, NV Elmar y WEB NV, y Sr. de Cuba a splica cu tin un persona na cabes di ANSA, pero e persona aki no tin e background di tur locual cu ta sosodiendo na ANSA NV. Esey ta haci’e un poco dificil di compronde e peso di e trabaonan cu ta wordo eherce den ANSA NV. Y esaki, segun Sr. de Cuba, kisas ta push’e den un otro pensamento. Y esaki ta algo cu tin cu bay wordo discuti cu minister, mirando e hecho cu a bin un rapport di DRH pa locual ta trata e funcionnan cu tin eydennan. Pero tambe e rapport cu a bin di DRH, STA ta bisa cu aunke cu e ta bastante obhetivo, e no a bin di un persona cu conoce e embergadura berdadero di e trabao cu ta wordo eherce den toren. Esaki ta un trabao cu ta exigi hopi esfuerso mental. Tur hende sa, cu e empleado di ANSA NV den toren, cu comete un eror, bo ta paga pe y tin ora cu hasta castigo di prizon. esey ta loke hopi hende no ta compronde. Hopi hende ta kere cu paso cu nan ta gana bon placa, nan no mag pidi mas, pero e embergadura y peso di e trabao aki, hopi hende no conoce. Hendenan cu ta den field y cu ta delegado di STA, tambe lo bay ta presente den e bestuur di STA, solicita cu minister Chris Romero pa splik’e, na placa chikito pa e compronde, kico berdaderamente ta e pensamento di STA pa e continuacion di e contracto colectivo y tambe pa loke ta e trahadonan nan responsabilidad den e compania aki. Te asina leu, Sr. Diego de Cuba, lider di sindicato STA.