Temporada di Fin di Aña ta den porta y cu esaki tambe, mester cuminsa pensa ariba siguridad di nos comunidad durante e temporada aki, sigur ora ta trata di tiramento di klapchi. Pero tambe cushinamento, unda cu hopi hende ta distrai y ta laga cuminda ta cushina ariba stoof, cual sigur por tin su consecuencianan. Sr. Ferdinand Ponson, vocero di Cuerpo di Bombero, ta relata mas ariba esaki.
Semper tur aña ta tene cuenta cu siguridad na cas, awa y coriente no ta bay bon cu otro. Hopi hende ta dorna cas pafo y p’esey ta pidi pa tene cuenta cu esaki, ora di uza extension, tape esaki di tal manera cu awa no por pasa pa no tin corto circuito. Paden di cas tambe, manera semper Brandweer ta bisa, esaki ta e temporada di kerstboom, corda pone awa den e baki. E lusnan corda pone esakinan ora tin hende na cas. Ta bon pa supervisa e kerstboom ora cu e t’ey. Aworaki tin yen lus moderno cu ta keda frieu, pero semper tin cosnan cu por pasa. Ora no tin hende na cas, paga e lus di kerstboom. Semper zorg pa ta preventief bezig pa tur cos ta na ordo y pa asina gai cora no canta den bo cas.
E ultimo añanan, accidentenan na cas a baha hopi. Tin hopi mas conscientisacion, den prevencion. Tin mas video ta wordo poni ariba rednan social. No ta sobrecarga e sistema di coriente, cu e lusnan ta bira cayente. Dus tin hopi cosnan pro activo/preventivo ta tumando luga, cual ta pone cu candela a baha hopi durante fin di aña. Candelanan di mondi si t’ey ainda, pero pa loke ta candelanan na cas, esaki si a baha hopi.
Cushinamento, trahamento di ayaca, horna ham di pasco, tur esakinan a cuminsa caba. Sr. Ponson ta pidi pa paga tino ariba esaki, supervisa e cushina ora ta bezig ta cushina. Tin hende door di celular, nan ta lubida di cu nan tin cuminda ariba stoof. Vooral den cushina, no laga mucha bin paden den cushina. Durante ultimo dianan di aña, tene cuenta cu esaki. Keda monitor ora di cushina y si mester sali, aunke un rato, paga e stoof. No bay laga cas cera y cuminda ariba stoof ta cushina. No bay spaar e minuutnan, ya cu esaki por trece consecuencia den cas y esaki ta algo cu niun hende no kier pa pasa. Te asina leu, Sr. Ferdinand Ponson, vocero di Cuerpo di Bombero, cu e relato.