Temporada di campamento ta bay cuminsa y Cuerpo Policial di Aruba no ta para kedo y ta tuma tur tipo di precaucion. Vocero Policial, Liliana Rasmijn a splica cu campamento lo cuminsa dia 9 di April, pa 12’or di merdia y no prome. Manera cu ta mira e proceso cu e ta bayendo durante añanan, no tin mucho cos di bay delanta, cada districto ta percura pa tempran sinta cu e campistanan, y ya nan ta bay wak e luganan caba. Por ta si tin dos hende cu a kies pa e mesun tereno, e ora ta negosh’e na mesa di biaha y na unda cu por bisa cu ora e dia yega, ya tur hende sa e zona cu ta di nan pa nan por campa.
Rasmijn a splica cu compara cu aña pasa, ta sinti cu el a baha un poco. Vooral e area di San Nicolas, sa cu aña pasa tabata tin 154 peticion y te cu siman pasa diabierna, tabata tin 118. Por mira eynan cu e peticionnan a cay drasticamente. E otro districto no por bisa. Playa, normalmente ta varia entre 19 y 21. Semper ta e mesun famianan ta bay campa na Linear Park. Loke ta Noord, tin cu check ainda, pero pa Rasmijn, e ta bahando un tiki e aña aki. Loke ta San Nicolas por bisa si, el a baha.
Ultimo dia pa haci peticion, tabata dia 24 di Maart, dus no por haci peticion mas. Pesey a saca un comunicado siman pasa, pa recorda tur hende. E periodo di campa ta 9 di April, 12’or di merdia, te cu dia 23 di April.
Pa esnan cu mes dushi ta bay campa, y ta bin cu tur cos, ora cu bay cas bek, bin cu tur cos cas. Kita trailer, kita tent, bay cu tur cos, pa e turistanan cu ta haci uzo di dje.
Esnan cu kier bin campa awo, ta laat. Bo mag di bay pasa dia, bo ta haci uzo di e beachnan, pero loke ta campa, habri tent, eynan bo mester a haci un peticion. Pa e zona cu ta bay uza, cada tent, obheto cu bo pone of bo ta bay pone riba dje, ta 7,50. E controlnan ta sigui tur dia, manera cu campamento cuminsa, pasobra tin hopi hende un tiki sabi, cu nan ta bisa cu ta bay cinco tent y ora cu polis yega controla, tin 10. Polis ta controla, e por ta mainta, atardi of anochi.
Pa loke ta e parti di strand, Eagle y Noord, e ta bay percura pa esey.
E otro districtonan, Playa, tin e polisnan di bario y lo bay haci esey cu un team special.
Loke ta San Nicolas, tin e politiepost den Colony, unda cu tur hende por acerca, pero nan ta esun cu ta bay haci control. Di parti di KPA, ta pidi un biaha mas, esun cu a pidi e permiso, ta responsabel pa tur cos cu pasa y ta cerca bo polis lo acerca si tin un problema. Wak pa bo tin bo permiso visibel. No bay pone den dashboard y ora bay cumpra algo, polis ta bin controla. E mester ta visibel, unda cu ta controla tur obheto cu wordo poni riba beach, cu e ta cuadra tambe, Rasmijn a splica.