Tempo mi tabata chikito mi tabata tin un maestra hopi streng cu a pone cu mi no ta hisa man lihe pa haci pregunta

Durante un situacion real unda retonan social ta aumenta den un sociedad, cifranan di divorcio ta halto y muchanan ta lanta menos cubri y insigur, con importante e discubrimento di identidad y proposito ta, pa cada individuo – hoben of adulto – ta keda un pregunta clave.

Grandi ta e trabou cu mester wordo haci. Uno, cu kisas lo duna complitud di su fruto den generacionnan nos dilanti, sinembargo tin caminda pa cuminsa. Y cu bon material, cu ta exactamente loke Sra. Sharleen Tromp, Docente y Desaroyado di Identidad y Talento certifica a opta pa bay certifica su mes aden y ta compartiendo cu institutonan clave riba nos pais. Tromp tin un pasion pa guia individuonan discubri nan identidad y proposito pa asina cana den e direccion corecto y desaroya individuo den nan capacidad como un lider den nan area di experticio.

Den cuadro di esaki Tromp a opta pa duna lectura tocante identidad y talento – na Hulandes yama, Identiteitsontwikkeling. Recientemente Tromp tabata tin e oportunidad pa comparti cu futuro docentenan, esta, studiantenan di Instituto Pedagogico Arubano (IPA), kendenan a keda masha satisfecho cu e material.

“E materia tabata super bon y a yuda mi hopi. Awor aki mi ta mas consciente di mi debilidad y di otro hende nan debilidad. Mi ta haya e materia algo esencial pa tur docente pasobra un docente mester compronde cu den su klas tin diferente tipo di alumno cu diferente tipo di actitud y bo mester sa con pa relaciona cu nos futuro generacion. Por ehempel, si bo ta un persona cu abo so kier domina, e alumno no por expresa su mes y e ta bay sinti su mes neglisha, cu lo pone cu e lo bay cera y no lo bay funciona optimal. Y ta trata di nos futuro generacionnan. Mi ta kere un oportunidad pa profundisa mas ainda den e materia aki, ta nesesario pa tur docente,” Gillienne Wester, Studiante di IPA a bisa.

“Prome cu esaki mi tabata tin un conocemento mas general pero awo cu mi a haya e material aki mi a haya mas profundidad y el a bira mas concreto di con e caracteristicanan ta hinca den otro. El a duna mi mas conocemento. E ta hopi importante como docente, coleganan di trabou y tur tipo di relacionnan pa por compronde otro y acepta otro pasobra si bo no compronde otro y acepta otro, tur cos ta tranca y e funccionamento di e relacion no lo bay ta productivo,” Shirley Rafini, Studiante di IPA a bisa.

“Mi a reconoce mi mes full den e materia, por ehempel mi ta un hende cu gusta mi cosnan hopi organisa. Den mi cashi di camber ta secciona segun color, mi no gusta pa esaki ta plama. Tambe mi por a reconoce, cu mi ta un persona cu no ta pordona lihe, pero e material di awe a pone mi reconoce esey den mi mes y el a haci mi realisa dicon otro ta manera cu nan ta y mi a hay’e importante pa por conoce otro y tene nan tipo di personalidad na cuenta. E persona contrario di mi, cu ta menos organisa, ta por ehempel hopi bon den socialisa. Algo cu ami ta menos bon dje, cu tambe ta bon pero el a pone mi mira e otro persona su parti bon,” Nathalie Maduro, Studiante di IPA a bisa.

Maduro a sigui bisa cu e ta kere cu e ta hopi bon pa tur docente. “Pasobra ami mes, tempo mi tabata chikito mi tabata tin un maestra hopi streng cu a trata mi hopi malo y esaki a pone cu te dia di awe mi no ta hisa mi man lihe pa haci pregunta. Y mi ta kere cu e docentenan aki, tabata tin falta di e material aki pa por a haya sa dicon cierto alumno ta manera cu nan ta y pa por trata cu nan di manera cu ta edifica nan. Docentenan tin un rol hopi importante y ta di gran influencia den e bida di un mucha y ta un modelo cu mester sa edifica nos sigiente generacion.”

Formacion di identidad ta cuminsa na cas, den e ceno familiar, den union di matrimonio, pero cualkier daño cu ya a wordo haci caba, mester y por wordo trata y restaura.

“Awo mi lo tene cuenta cu miembronan di mi famia di cierto di nan actitudnan of ora cu nan mes hala mi atencion pa mi actitudad of comportacion. E lo haci mi mas consciente di mi debilidad y mi lo busca pa mehora mi mes den e area ey,” Shirley Rafini, Studiante di IPA a bisa.

Dia 25 y 26 benidero lo bay tin un charla tocante e materia aki na Biblioteca Nacional. Na playa dia 25 y San Nicolas dia 26. Esaki ta pa hoben y pa mayornan cu ta desea di compronde nan yiunan miho.

Comments

comments