AMSTERDAM, Hulanda- E cambio climatico ta wordo sinti rond mundo. Paisnan cu normalmente ta haya un zomer basta rustig e aña aki ta sufriendo bou di temperaturanan extremadamente halto. Hulanda mes ta un di e paisnan caminda cu e poblacion no sa mas con pa haci di calor cu ta haci. Ultimo dianan e temperaturanan no tabata baha bou di 30 grado. Den parti sur di Hulanda, e ta mas cayente ainda, cu temperaturanan di 35 grado. Pa diahuebs ta ser spera cu lo por un tiki mas fresco.
Loke ta haci e calor mas insoportabel ta e hecho cu ta bin mas humedad den aire. Esey lo haci e tempo mas pisa, mas benauwd tambe.
Diaranson cu tabata e prome dia oficial di zomer, ya caba tabata wordo papia di un ola di calor den partinan di Brabant y Zeeland, caminda temperaturanan a yega 25 grado for di diasabra y e temperatura maximo no a baha mas. E ultimo tres dianan tabata tin temperaturanan tropical, di riba 30 grado. E ola di calor ta ser spera cu lo afecta henter Hulanda diahuebs.
Antiyano y Arubianonan residencia na Hulanda mes ta keha di e temperaturanan halto. Tin hende ta hasta cumpra e poolnan di mucha pa yena cu awa y asina fresca nan mes tambe. Temperaturanan ta increiblemente halto. Ta spera algun awasero, pero esey lo ta gewoon kerosin ariba e candela, pa un Hulanda cu ta sufriendo un secura enorme.
Fuente: www.rtlnieuws.com