QUITO, Ecuador- Diabierna atardi, un fuerte movimento telurico di 6.3 grado ariba e scala di Richter a sacudi e costanan di Ecuador.
E Instituto Geofisico de la Escuela Politécnica Nacional di e capital di Ecuador, Quito, a registra e epicentro den Oceano Pacifico, na 65 km di e localidad di Jama, provincia di Manabi, na 9 km di profundidad.
Medionan local a señala cu e Instituto Oceanografico di Armada a evalua e fenomeno pa determina si e movimento lo por causa un tsunami.
E sismo fuerta aki a wordo sinti den e ciudadnan grandi di e costa Ecuatoriano, manera Manta, provincia di Manabi, Guayaquil y Milagro. No tabata tin reportenan di dañonan structural ni personanan afecta.
Dia 16 di April 2016, un teremoto di magnitud di 7.8 grado a sacudi varios ciudad di e provincia di Manabi y a comberti den e fenomeno natural mas destructivo di e ultimo 30 añanan. E teremoto a cobra bida di 663 persona, causando biyones di dollar den perdidanan economico y mas di 3 mil replica a wordo sinti.
Fuente: www.actualidad.rt.com