WASHINGTON, D.C. – Merca- Diamars ultimo, Presidente di Merca a tene su prome discurso den Congreso, den e asina yama State of the Union. Siguientemente e shete puntonan central di e discurso di Trump.
Reforma migratorio
“E comunidadnan inmigrante tambe lo wordo yuda pa e politicanan migratorio, cu lo focus den e bienestar di e trahadonan y e famianan Mericano. Durante decadanan, e fronteranan a permiti e ingreso di droga y gangnan den nos comunidadnan mas vulnerabel. Awe nochi mi ta pidi Congreso pa finalmente cera e bashinan huridico cu a permiti cu e Mara Salvatrucha y otro criminalnan drenta nos pais. Nos a propone un amienda cu lo traha ariba nos leynan di inmigracion. Ta mi deber y e deber sagrado di cada un di e miembronan di Congreso pa defende e Mericanonan: proteha su siguridad, su famia, su siguridad y su derecho ariba e soño Americano. Pasobra e Mericanonan tambe ta Dreamers (soñadonan). Nos ta presenta Congreso un propuesta detaya cu ambos partido lo mester apoya pa un compromiso husto”.
“E prome pilar di nos plan preliminar ta ofrece un caminda pa ciudadania pa 1.8 miyon di inmigrante ilegal cu a wordo treci akinan na un edad hopi jong. Cu nos plan, esunnan cu ta cumpli cu e rekisitonan educativo y di trabao, cu ta mustra un bon carácter moral, lo por bira ciudadano di Merca. E di dos pilar ta pa sigura nos frontera. Esey kiermen construi un muraya na e frontera sur. E di tres pilar ta pa stop cu e loteria di visa. Esaki ta un programa di suerte cu ta entrega tarhetanan di residencia sin para keto riba abilidad, merito of siguridad di nos hendenan. E di cuater y ultimo pilar ta proteha nos famia door di stop cu e migracion en cadena”.
Guantanamo
“Den pasado nos a libera, di manera kens, cientos di teroristanan peligros, djis pa bolbe haya nan den e campo di bataya, incluyendo e lider di ISIS, al- Baghdadi. P’esey awe mi ta bolbe cumpli cu’n promesa. Mi a caba di firma un orden pa e secretario Mattis reevalua nos politica y mantene e centro di detencion na Guantanamo habri”.
Iran, Cuba, Venezuela, Noord- Korea
“Ora cu e pueblo di Iran a halza su mes contra di e crimennan di un dictadura corupto, mi no a keda keto. Merca a apoya e pueblo di Iran den su lucha pa libertad. Mi ta pidi Congreso pa afronta e fayonan fundamental den e acuerdo nuclear cu Iran. Mi gobierno a impoen sancionnan duro contra di dictaduranan comunista y socialista di Cuba y Venezuela. Pero niun regimen a oprimi su mesun ciudadanonan mas brutal cu e dictadura cruel cu esun di Noord- Korea. Pa nos ta suficiente di wak e caracter inhumano di e regimen di Noord- Korea, pa nos por compronde e naturalesa di e amenaza nuclear cu por presenta pa Merca y su aliadonan”.
Terorismo
“Aña pasa mi a priminti cu nos lo traha hunto cu nos aliadonan pa caba cu ISIS. Un aña despues, mi ta orguyoso di informa boso cu e coalicion pa derota ISIS a libera casi 100% di e teritorio di Irak y Siria cu un tempo e asesinonan aki tabata controla. Pero tin hopi mas trabao pa haci. Nos lo sigui cu nos lucha te ora cu nos caba cu ISIS. Teroristanan cu ta haci cosnan manera pone bombnan den hospitalnan civil ta hendenan malvado. Manera cu e posibilidad presenta, nos lo caba cu nan. Pero nos mester ta claro: teroristanan no ta solamente criminalnan. Nan ta combatientenan di pafo di lo legal. Y ora cu nan wordo gara den exterior, nan lo mester wordo trata como terorista. Mi lo no ripiti e fout di e gobiernonan anterior cu lo hiba nos na e posicion peligroso”.
Fuente: https://www.infobae.com