Fundacion Telefon pa Hubentud Aruba a wordo funda riba 26 di April 1999 y tin como meta: (1) pa duna informacion, opcion y sosten emocional na muchanan y/ o hobennan di Aruba via telefon o internet; pa preveni, reduci o pa stop cualkier problema o aclaria cualkier pregunta cu e mucha y/ o hobennan tin pa cu nan mes o pa cu nan ambiente; (2) Monitor temanan relaciona cu mucha y hoben y señala na organisacionnan, gobierno y comunidad kico ta biba bao di e mucha y hobennan y kico ta nan necesidad.
E trabao di Fundacion Telefon pa Hubentud Aruba ta wordo realisa den gran parti door di boluntario y pesey nos ta buscando voluntario pa e siguiente tareanan:
– E boluntario mester duna via telefon ayudo, informacion y conseho na mucha y hobennan (minimo 2 ora pa siman ariba diamars, diabierna, diasabra o diadomingo);
– E boluntario mester duna via internet (chat, mail etc.) ayudo, informacion y conseho na mucha y hobennan (minimo 2 ora pa siman ariba diamars, diabierna, diasabra of diadomingo);
– Y/of duna charla y tayer na scolnan;
– Y/of duna informacion na publico na stand di Fundacion Telefon pa Hubentud Aruba durante actividadnan.
Rekisito:
– Bon dominio di Papiamento y Hulandes;
– Minimo 16 aña di edad;
– Entusiasma y disponibel.
Nos ta ofrece:
– Training;
– Minimo dos biaha pa aña ‘deskundigheidsbevordering’;
– Un ambiente placentero y di aprendisahe.
Bo ta nos boluntario nobo? Tuma contacto cu nos: [email protected] o telefon 588-6138 of 588-4011.