Diaranson, dia 8 di april 2020, Telearuba conhuntamente cu CEDE Aruba y den bon comunicacion cu Gobierno di Aruba a lanza un canal nobo specialmente pa e temporada di COVID-19. E nomber di e Canal aki ta NOS ISLA.tv y lo ta dedica na tur miembro di e famianan na Aruba.
Durante e ultimo dos siman nan tabata tin dos iniciativa desaroyando. Na un banda, Promer Minister di Aruba y Comision di Crisis a hasi un apelación pa contenido pa nos grandinan cu ta den isolacion y tur famianan cu ta na cas siguiendo e medidanan tuma pa evita plamamento di e virus. Na e otro banda, CEDE Aruba hunto cu varios instancia y persona tabata creando e programa ArubaSolidario y tabata graba contenido educativo y practico pa nos famianan na cas. Den e proceso, Telearuba y CEDE Aruba a topa otro na caminda, cu e mesun obhetivo y a acerca SETAR cu e peticion pa un canal apart SETAR a pone canal 42 disponibel, pa e temporada cu e situacion di crisis perdura.
Canal 42, NOS ISLA.tv, ta un canal comunitario.Telearuba lo no cobra pa airtime, pero tampoco lo paga pa contenido. Pesey Telearuba y CEDE Aruba ta manda un invitacion na tur productor, instancianan y persona cu ta desea pa contribui na e canal comunitario aki, cu contenido relaciona cu p.e. cushinamento, maneho financiero, salud físico y mental, ehercicio, manualidad, programa pa mucha, mensahenan positivo y otro topiconan valioso pa e siguiente temporada. Lo kier dedica extra atencion na storianan di nos grandinan y con nan a surpasa temponan difícil. Banda di esaki, Telearuba lo pone e contenido di su archivo extenso y lo asisti den produccion unda cu por.
Telearuba y CEDE Aruba ta consciente cu tin hopi contenido ariba cable na Aruba y ariba social media rond mundo. Na e mesun momento, nos comunidad ta gusta wak cosnan produci localmente, pa nos mesun hendenan. Ambos instancia ta kere cu nos mesun hende lo tin consehonan hopi valioso y pesey ta kere den e concepto di un canal comunitario. Nos ta pidi comunidad henter pa sigui e programa di Canal 42 NOS ISLA.tv y e contenido di ArubaSolidario.
Cada productor, instancia of persona cu ta desea di contribui cu contenido y tempo, por tuma contacto cu nos pa medio di e-mail na [email protected], [email protected] of via telefon na 597 1216. Un productor lo contact bo persona pa coordina e proceso. Telearuba y CEDE Aruba kier felicita e comunidad di Aruba pa su mesun canal comunitario cu lo yuda entretene e comunidad durante e periodo aki.