E director ehecutivo de Meta, Mark Zuckerberg, a hay’e cu e batata cayente diaranson ora cu el a acudi na un audiencia hudicial di Senado di Merca, enfoca riba explotacion sexual infantil, benta di droga y contenido online cu por yega na suicidio.
Asina e senador Ted Cruz a hala atencion di e empresario pa un screen cu ta aparece n’e usuarionan di Instagram pa nan busca material di abuso sexual infantil.
E legislado a mustra un documento imprimi cu tabata representa e screen cu e advertencia cu “e resultadonan por contene imagen di abuso sexual infantil.”
“E ora abo a duna e usuarionan dos opcion: obtene herment of mira e resultadonan den tur manera. Señor Zuckerberg, den kico bo tabata pensa?”, e senador a puntra, mustrando e advertencianan riba e documentonan imprimi.
“Nos por ta fout,” e magnate a admiti.
N’e pregunta di cuanto biaha e screen di advertencia a aparece riba su red social, Zuckerberg a reconoce cu e no tabata worry cu ne.
E audiencia hudicial di Senado tambe a conta cu e presencia di e directornan ehecutivo di Discord, Snapchat, X y TikTok.
Durante e acto, a mustra un video di menor cu tabata papia di nan experiencia di acoso y abuso online. Famia di e personanan afecta tambe a asisti n’e audiencia, algun cu borchi compartiendo e storia di nan yiunan cu a muri door di acoso, benta di droga y contenido riba suicidio.
