Pa varios luna, e placa cu a wordo pidi como rescate despues di e ciberatake masivo conoci como “WannaCry” a keda intacto riba un cuenta onlien. Pero el a wordo movi.
Mas di 140 mil dollar na bitcoins a wordo saca for di tres cuenta relaciona cu e virus ransomware cu a afecta cientos di miles di computer rond mundo na Mei.
Aunke niun hende no sa ken a haci esaki y pakico, si e hackernan di WannaCry finalmente ta purbando di mishi cu e placa, nan lo mester burla di autoridadnan mundial. Esaki ta duna e caso un buelta nobo den e misterioso atake cu e expertonan di cybersecurity a relaciona cu un grupo di hackers asocia cu Noord- Korea.
Ora cu e virus WannaCry a cuminsa move den mas di 150 pais, infectando sistemanan di hospital, negoshi y gobierno, a pidi e victimanan pa paga un rescate di 300 dollar den bitcoins.
E transaccion y cuentanan di bitcoin ta publico, pero tambe anonimo. E transferencianan a wordo haci diaranson for di e cuenta di WannaCry, cu a pidi atencion pa un bot riba Twitter (@actual_ransom) cual a wordo crea pa monitornan.
E fondonan a wordo movi for di tres cuenta principal liga na e hackeo di otro nuebe cuenta. SI e hackernan purba di move e placa, siguramente nan lo sa tambe cu nan ta wordo observa.
Autoridadnan ta alerta y lo sigui e movimento di e bitcoin, segun Matthieu Suiche, fundador di Comae Technologie. Investigadornan lo por sigui e rastro di e movimentonan digital cu ta wordo haci entre e cuentanan.
Melanie Shapiro, CEO di e compania di siguridad, Token a bisa cu e fondonan di bitcoin ta wordo movi pa asina nan por wordo rastrea menos.
“Nos por wak con nan ta move e bitcoinsnan, pero cada move ta complica mas e posibilidad di rastrea su origen hacia un individuo”, segun e experto.
Pa aworaki autoridad- y investigadonan lo supervisa e cuentanan nobo di bitcoin na cual e placa a yega, pa asina monitor loke lo pasa despues.
Fuente: http://cnnespanol.cnn.com/