Gobierno di Merca y expertonan di rond mundo a adverti riba un fayo di siguridad detecta den e sistema di conexión Wi- Fi uza pa miyones di persona rond mundo.
E faya a keda detecta den e protocol WPA2, considera un di esunnan mas sigur pa e conexionnan wireless ya cu e ta codifica e trafico di rednan, caminda cu por transmiti clavenan di acceso, numbernan di credit card y informacion confidencial, djis pa menciona algun.
E fout aki, por permiti piratanan informatico pa spiona of secuestra miyones di dispositivonan electronica conecta riba wireless. “Ora cu e vulnerabilidad ta keda habri, atacantenan ta probecha di tuma control di un sistema afecta”, según e ekipo di respuesta di emergencia informatico di Merca.
E faya a wordo descubri pa investigadonan di e Universidad Belga KU Leuven y a haya e nomber di KRACK, un afkorting pa Key Reinstallation AttaCK (atake di reinstalacion di clavenan).
Según investigadonan, cu e fout aki, e siguridad di delincuentenan cibernetico por, no solamente horta informacion sino tambe infecta aparatonan cu virus informatico cu tur e sistemanan operativo cu ta wordo conecta ariba rednan vulnerabel.
Pa minimisa e risico di e uzo di conexionnan wireless, expertonan ta recomenda pa uza rednan virtual priva (VPN) y actualisa dispositivonan manera e router. Ademas, tambe por opta pa navega uzando un punto di red fiho, cu cable.
Autoridadnan Mericano a bisa cu e fabricantenan y proveedornan di tecnologia wirelesss a wordo notifica riba e fayo aki na fin di Augustus pa duna tempo pa realisa actualisacion di siguridad.
Microsoft a duna di conoce cu dia 10 di October el a cuminsa cu updatenan pa proteha e usuarionan di dispositivonan Windows. Google, di su parti, tambe a bisa cu e ta na altura di e situacion y cu e lo take care di dispositivonan Android afecta, den e proximo simannan”.
Fuente: http://www.noticiasrcn.com