ASGARDIA- E Reino Espacial di Asgardia, cual cantidad di ‘ciudadano’ te cu awe, diahuebs 16 di November 2017, ta di 116.789 persona, dia 12 di November a lansa su prome satelite pa espacio, e Asgardia -1, segun e website di e prome ‘nacion’ espacial’.
“E lanzamento di e prome satelite di Asgaridia ta establece teritorio soberando di e nacion den espacio y ta cumpli cu e ultimo condicion necesario pa admision na ONU, cu ademas di un constitucion, un gobierno y un moneda, e nacion mester tin tambe un teritorio”, segun e comunicado oficial.
E Asgardia-1, cu ta mas o menos e tamaño di un bara di pan y ta pisa 2.8 kg, ta contene mei TB di datonan, cu ta inclui tur e documentonan y simbolonan legal di Asgardia, e Declaracion di Unidad y Constitucion, simbolonan nacional, como tambe e archivonan personal presenta pa ciudadanonan di e nacion espacial.
E satelite a wordo lansa for di un instalacion di NASA den e estado di Virginia (Merca) a bordo di un nave espacial Cygnus den un raket orbital ATK Antares. Cygnus lo acopla su mes na e Estacion Espacial Internacional dia 14 di November pa cumpli cu su mision principal di entrega suministro na e astronautanna y despues di un luna, e lo desacopla y lo aleha na mas distancia di Mundo, caminda cu e lo pone e satelite Asgardia-1 definitivamente den orbita.
Kico ta Asgardia
E lansamento di e proyecto ambicioso cu a wordo anuncia dia 12 di October aña pasa. Segun e creado di e nacion, e cientifico Ruso Ígor Ashurbeyli, e obhetivo di e proyecto ta di crea un espacio “desmilitariza” pa e desarroyo cientifico, purba na sigura e uzo pacifico di espacio y proteha Mundo di menasanan espacial manera tormentanan solar, cometanan y posibel contagio causa pa microorganismo di curpanan Celeste. A largo plazo, ta kere cu lo crea un escudo protector pa Mundo y plataformanan den espacio.
E mas peculiar di Asgardia ta cu e no tin teritorio y ta existi solamente como un plataforma virtual, unda e mayor parti di actividadnan pa su ciudadanonan ta desaroya.
Aunke cu Ashurbeyli tin plannan pa construi algun dia, colonianan Asgardiana den espacio y purba na convence ONU pa reconoce Asgardia como nacion soberano, actualmente no ta reconoci pa ningun pais riba e planeta. Pa awo, e unico beneficio ofreci na e miembronan di e nacion espacial ta e capacidad di subi datonan na Asgardia-1 den orbita.
Fuente: http://edition.cnn.com/
Fuente: https://actualidad.rt.com