Recientemente tabata na Aruba un K9 trainer conoci di Merca, kende tin contacto cu Cuerpo Policial di Aruba pa medio di diferente conferencia internacional. Durante di su vakantie el a dedica algun dia pa haci un “refreshment training” cu e Team di K9 di Cuerpo Policial, cual actualmente ta cay bao di liderasgo di Richard Kramers.
El a evalua con a cachonan ta eherce nan trabao y tareanan. A inclui entre otro, Kramers a splica, training di mordemento y diferente scenario realistico cu nan ta experencia den nan trabao diario manera detencion, buscamento di narcotica y buscamento di explosivo.
Eric Stanbro a observa con e reaccion di e cachonan ta, nan habilidad, e parti di obediencia y si nan ta den e condicion cu ley ta prescribi, Kramers a bisa. Stanbro a agrega cu el a inclui tambe den e training un parti unda cu e ta yuda e cachonan sali for di habitonan ekiboca cu nan a crea den transcurso di tempo.
E cachonan ta desenbolbe manera tur otro cacho, mescos cu e cachonan K9 na Merca, Stanbro a comenta. El a remarca cu nan a haci bon trabao pa cu e parti di deteccion y den otro tareanan. E cachonan a haci hopi bon, el a añadi.
Ta certifica e unidad K9 di Aruba cada dos aña. Ta e intencion pa sigui haci mas training cu expertonan den e mundo di cacho specialisa aki. E trainingnan a tuma luga siman pasa y no obstante awasero y mal tempo, esaki no a stroba.
Eric Stanbro ta e “head trainer” di e team di K9 di e N.E. Ohio Police Department, kende tambe a train cachonan pa e specialisacion “multi purpose canines for naval special warfare group 1” (SEALS). E tin experiencia cu “single purpose training” (entrenamento pa un proposito), sea narcotica of explosivo y cu “dual purpose training”, unda cu ta combina e habilidadnan pa cachonan por detecta narcotica y explosivo.